दाङ । उच्च अदालत तुलसीपुरले मंसिर मसान्तसम्म लक्ष्यभन्दा बढी मुद्दा फर्स्योट गरेको छ । चालु आव ०७६/७७ को साउनदेखि मंसिर मसान्तसम्म दर्ता भएका २ सय ३८ मुद्दामध्ये एक सय ७४ मुद्दा फर्स्योट भएको उच्च अदालतले जनाएको छ ।

उच्च अदालत तुलसीपुरका रजिस्ट्रार एवं सूचना अधिकारी प्रेम खड्काले साउनमा लक्ष्यअनुसार ३ मुद्दा, भदौमा २९ लक्ष्य रहेकामा दोब्बर बढी ६१ मु्द्दा, असोजमा १७ मुद्दाको लक्ष्य रहेकामा २५ मुद्दा, कात्तिकमा ३१ मुद्दाको लक्ष्य रहेकामा ५२ मुद्दा फर्स्योट गर्न सफल भएको जानकारी दिए ।

मंसिरमा भने ४८ मुद्दा फर्स्योट गर्ने लक्ष्य राखिए भए पनि त्योभन्दा केही कम ३३ मुद्दा मात्रै किनारा लगाउन सकिएको सूचना अधिकारी खड्काले जानकारी दिए ।

उच्च अदालतको हालसम्मको तथ्यांक नियाल्दा लक्ष्यभन्दा बढी (१३९.२० प्रतिशत) प्रगति भएको खड्काले बताए । अदालतका मुख्य न्यायाधीश रमेश पोख्रेलले चालु आवमा बलात्कारका मुद्दा धेरै दर्ता भएको जानकारी दिए । कतिपयले त्यसलाई पेसाका रुपमा समेत अँगाल्न खोजेको हुँदा बलात्कारका घटना बढेको उनले बताए ।