कोहलपुर/बाँकेमा सवारी दुर्घटना बढ्दो क्रममा देखिएको छ । पछिल्ला तीन महिना श्रावण यता सवारी दुर्घटना संख्या ४० पुगेको छ । श्रावण महिनामा ८ वटा सवारी दुर्घटना भएकोमा भाद्र महिनामा संख्या बढेर १३ पुगेको थियो । सवारी दुर्घटना संख्या न्यूनिकरणका लागि विशेष कदम चालिएपनि असोज महिनामा दुर्घटना संख्या ह्वात्तै बढेर १९ पुगेको छ । असोज महिनामा १२ जनाले सवारी दुर्घटनामा परी ज्यान गुमाएका छन् भने ६ जना गम्भिर घाइते बनेका छन् । यस्तै भाद्र महिनामा ५ र श्रावण महिनामा ४ जनाले सवारी दुर्घटनाबाट ज्यान गुमाउनु परेको थियो ।

जिल्ला ट्राफिक कार्यालय बाँकेसँगको तथ्यांक अनुसार पछिल्लो तीन महिनालाई मात्र अध्ययन गर्ने हो भने सवारी दुर्घटना न्यूनिकरण हुँदै जानुको सट्टा संख्या ह्वात्तै बढेको पाइन्छ । सवारी दुर्घटना न्यूनिकरण तथा सवारी नियम उल्लंघन गर्ने सवारी चालकलाई कारवाही तथा नियमन गर्ने प्रमुख निकाय ट्राफिक प्रहरीको कार्यसम्पादनकै कारण सवारी दुर्घटना न्यूनिकरणमा समस्या देखिएको जानकारहरुको भनाई छ । विशेष गरी चाडपर्वको समयमा ट्राफिक चेक पोष्ट तथा घुम्ती चेकजाँच प्रभावकारी हुन नसक्दा सवारी दुर्घटनाको जोखिम बढ्ने जनगुनासो रहिआएको छ । यात्रु क्षमता भन्दा बढि यात्रु सवार सवारीलाई कडा चेकजाँच तथा कारवाही गरिएको खण्डमा दुर्घटना न्यूनिकरणमा मद्दत पुग्ने आवाज उठिरहेको बेला चाडपर्वमा ट्राफिक चेकजाँचको क्रममा सवारी साधनबाट रसिद बिना रकम प्रहरीले असुल गरी छाडिदिने प्रवृत्तीका कारण दुर्घटना न्यूनिकरणमा सफलता पाउन नसकिएको ब्यापक जनगुनासो समेत छ ।

यस विषयमा जिल्ला ट्राफिक कार्यालय बाँकेमा केही समय अघि मात्र सरुवा भई बाँकेको जिम्मेवारी पाएका प्रहरी निरीक्षक यन बहादुर मल्लले आफ्नो कार्यकालमा सवारी दुर्घटना समस्या समाधानका लागि प्रतिबद्व रहेको प्रतिक्रिया दिएका छन् । उनले आपूmले जिम्मेवारी पाउनु अघि जिल्लाको ट्राफिक व्यवस्थापन तथा कार्यसम्पादन कसरी हुन्थ्यो, त्यो थाह नभएको तर आप्mनो कार्यकालमा कुनै पनि सवारी तथा सवारी चालकबाट अनुचित रकम आप्mनो मातहतका कर्मचारीहरुले नलिने गरी निर्देशन दिइसकेको बताएका छन् । सवारी दुर्घटना न्यूनिकरण तथा ट्राफिक व्यवस्थापन गर्ने क्रममा कुनै पनि आचार संहिता विपरित कार्य नहुने उनले प्रतिबद्वता जनाएका छन् ।