पाउँदै नपाएको पद नेमप्लेटमा उल्लेख

कोहलपुर/बाँकेका आठ स्थानिय तहहरुमा सबैभन्दा विवादको भुमरीमा चर्चा बटुलिरहने नगरपालिकाको रुपमा कोहलपुर नगरपालिकाले उपमा नै पाएको छ । स्थानिय निर्वाचनबाट निर्वाचित भएका जनप्रतिनिधीहरुले पदभार ग्रहण गरेपछि नगरपालिका प्रायजस्तो विवादित बन्दै आइरहेको छ । कहिले विकास निर्माण, कहिले कोहलपुर चौराहको स्तम्भमा राखिएको बाघको मूर्ती, कहिले गोलपार्कमा निर्माणाधिन भ्यू टावर, गाडी खरिद प्रक्रिया, कार्यालयको १७ कोठामा ३० वटा एसि जडान, कर्मचारीहरुको मनोमानी तथा जनप्रतिनिधीहरुको ब्रह्मलुट यस्तै अन्य शिर्षकहरु सहित विद्युतीय तथा छापा सञ्चार माध्यमहरुमा समाचारहरु प्रकाशन भइरहँदा नगरपालिका चलाउने व्यक्तिहरुले नै पद्दतीको खिल्ली उडाउँदै आइरहेका छन् ।

कहि नभएको जात्रा हाडिगाउँमा भनेजस्तै नगर प्रमुख लुट बहादुर रावत र उपप्रमुख सञ्जु कुमारी चौधरी पक्षबीचको विवादले बेला बेलामा नगरपालिकामा तरंग ल्याउने गर्छ । नगरसभामा बजेट प्रस्तुतिकरण, सार्वजनिक सुनुवाइ कार्यक्रम संचालन, योजनाको नामाकरण, वजेट बाँडफाँड, करारमा कर्मचारी भर्ना, लगायतको विषयलाई लिएर विवाद विवाद उत्पन्न हुने गरेकोमा अहिले नगर स्वास्थ्यमा कार्यरत कर्मचारीको मनोमानीका कारण फेरी विवाद सिर्जना भएको छ ।

स्थानिय तह कर्मचारी समायोजन अनुसार समायोजन भई कार्यरत स्वास्थ्य कर्मचारी शोभा अधिकारीले विधी, पद्धती लत्याउँदै आफ्नो कार्यकक्षमा उल्लेख गरेको नाम सहितको पदले पुनः विवाद सिर्जना भएको हो । समायोजन पछि नगरपालिकाले स्वास्थ्य कर्मचारी अधिकारीलाई अस्पताल नर्सिङ्ग निरिक्षक अधिकृत (छैठौं) भनेर पदस्थापना गराएको थियो । पदस्थापना गर्दा जुन पद उल्लेख गरिएको हुन्छ सोही पद कार्यकक्षमा रहने नेमप्लेटमा अनिवार्य रुपमा राख्नुपर्ने प्रावधान रहेपनि स्वास्थ्य कर्मचारी अधिकारीको कार्यकक्षमा रहेको नेमप्लेटमा राज्यले अधिकारीलाई दिदै नदिएको ओहदा उल्लेख गर्दै नर्सिङ्ग अधिकृत उल्लेख गरेकी छन् । उनले आफ्नो मनोमानि यतिमा मात्र सिमित नराखी हाजिरी पुस्तिकामा समेत नर्सिङ्ग अधिकृतकै रुपमा हाजिरी गर्दै आएको पनि तथ्य वाहिर सार्वजनिक भएको छ ।

नेपाल सरकारले जारी गरेको भ्रष्टाचार निवारण ऐन २०५९ को परिच्छेद १५ अनुसार यस्तो गतिविधीलाई अवैधानिक बताइएको छ । ऐनको परिच्छेद १५ अनुसार नपाएको ओहदा पाएँ भन्ने कुनै राष्ट्रसेवक वा अन्य कुनै व्यक्तिले आफुले पाएको ओहदा, अधिकार, हैसियत वा सुविधा पाएँ भनि वा कुनै राष्ट्रसेवकको ओहदा, अधिकार, हैसियत वा सुविधा प्रयोग गरेको पाइएमा ओहदा सम्वन्धी चिन्ह, पोषाक वा निस्सा देखाएमा राष्ट्रसेवकको ओहदा सम्बन्धी चिन्ह, पोषाक, वा निस्सा हो भन्ने अरुले विश्वास गरोस् भन्ने मनसायले त्यस्तो चिन्ह, पोषाक वा निस्सा देखिने कुनै कुरा लगाएमा वा देखाएमा निजलाई कसुरको मात्रा अनुसार एक वर्षदेखि दुई वर्षसम्म कैद र पचास हजार रुपैयाँदेखि एक लाख रुपैयाँ जरिवाना हुने स्पष्ट रुपमा उल्लेख गरिएको छ ।

यस विषयमा स्वास्थ्य मन्त्रालयसँग जिज्ञासा राख्दा कुनैपनि स्वास्थ्यमा कार्यरत कर्मचारीले समायोजन पछि हुने पदस्थापनामा जे उल्लेख गरिएको छ सोही अनुसार नै आफ्नो ओहदा खुल्ले गरी नेमप्लेटमा उल्लेख गर्नुपर्ने प्रावधान रहेको बताएको छ । मन्त्रालयको भनाई अनुसार अधिकारीले आफ्नो नेमप्लेटमा पदस्थापना हुँदा अस्पताल नर्सिङ्ग निरीक्षक अधिकृत (छैटौं) उल्लेख गर्नुपर्नेमा नर्सिङ्ग अधिकृत मात्र उल्लेख गरेकाले राज्यले प्रदान नगरेको ओहदा पाएँ भनेर भ्रम सिर्जना गर्नु ऐन विपरित हुन जाने देखिन्छ ।
यस विषयमा कोहलपुर नगरपालिका नगर प्रमुख लुट बहादुर रावतसँग किन राज्यले दिदै नदिएको ओहदा अधिकार उल्लेख गरेर नगर स्वास्थ्यमा कार्यरत कर्मचारी अधिकारीले भ्रम सिर्जना गरिरँहा कुनै सुनुवाई नगरेको भन्ने प्रश्नमा स्वास्थ्य निकायहरुमा अनौठो प्रकारको नियम पद्धती हुने गरेको भन्दै आफु स्वयम् अचम्मित भएको प्रतिक्रिया दिएका छन् । स्वास्थ्य बाहेक अन्य निकायहरुमा वरियताक्रम अनुसार कर्मचारीहरुको श्रेणि छुट्टिने तर स्वास्थ्यमा सम्बन्धित मन्त्रालयको सचिव, उप–सचिवसँगको सम्वन्धको आधारमा कर्मचारीहरुले मनोमानी गर्ने गरेको बताए । स्वास्थ्य मन्त्रालयबाट पटक पटक आउने परिपत्रहरुले विवाद बढ्दै गएको बताए । पहिले नगर स्वास्थ्यमा प्रमुखको रुपमा सातौं तहको अधिकृत सेवाबाट निवृत भएपछि छैटौं तहको अधिकृत अनिल सेन नगर स्वास्थ्य प्रमुख भएर काम गर्दै आएको बीचमा कर्मचारी समायोजनबाट एक तह बढुवा भई शोभा अधिकारी स्वास्थ्य नर्सिङ्ग छैटौं तहको अधिकृतले आफु सेनको भन्दा तह बढि रहेको दावी गर्दै नगर स्वास्थ्य प्रमुखको रुपमा दावी गर्दै आइरहेकाले विवाद बढ्दै गएको नगर प्रमुख रावतले बताए । कहिले मन्त्रालयबाट सेनलाई प्रमुखको जिम्मेवारी प्रदान गर्नु भन्ने परिपत्र आउँछ त कहिले अधिकारीलाई प्रमुखको जिम्मेवारी प्रदान गर्नु भन्ने परिपत्र आउँछ । मन्त्रालयको परिपत्रले हामीलाई अन्यौलता थपिरहेको छ नगर प्रमुख रावतले भने । पछिल्लो समयमा मन्त्रालयबाट पुनः सेनलाई शाखा प्रमुखको जिम्मेवारी प्रदान गर्नु गराउनु भन्ने परिपत्र आएपछि सेनले नै जिम्मेवारी पाइरहेको नगर प्रमुख रावतले जानकारी दिए ।

नगर स्वास्थ्यमा शाखा अधिकृत सेन वा अधिकारी को भन्ने भन्दा पनि अधिकारीले राज्यबाट नपाएको ओहदा पाएँको भन्दै भ्रम सिर्जना गरेको विषय पेचिलो बन्दै गइरहेको हो । भ्रष्टाचार निवारण ऐन २०५९ ले स्पष्ट रुपमा राज्यबाट पाउँदै नपाएको ओहदा पाएँ भन्ने कर्मचारी कारवाहीको भागिदार बन्ने बताइएपनि अधिकारीले आफ्नो नेमप्लेटमा नर्सिङ्ग अधिकृत उल्लेख गर्न पाउने दावी गरेकी छिन् । अधिकारीले तहगत बढुवा भएकोले नर्सिङ्ग अधिकृत लेख्न मिल्ने भएकोले नेमप्लेटमा नर्सिङ्ग अधिकृत लेखिएको दावी गरेको छिन् ।

यता नगर स्वास्थ्य प्रमुख सेनले यस विषयमा पटक–पटक छलफल हुँदा व्यक्तिगत पहुँच र पावर छ भन्दै जे गरेपनि केही हुँदै भन्ने मानसिकताका कारण कानुनमा व्यवस्था नै नभएको पद पाएको भनि गैर जिम्मेवार ढंगले अधिकारीले मनोमानी गरिरहेको प्रतिक्रिया दिएका छन् । सेनले पदगत रुपमा नियुक्ति पाउन बिएन/बिएस्सी नर्सिङ्ग अध्ययन गरेपछि लोकसेवा आयोगबाट योग्य प्रमाणित भएपछिमात्र नर्सिङ्ग अधिकृतको ओहदा पाउने बताएका छन् । साथै उनले कोहलपुर नगरपालिकाले पदस्थापना गर्दा जे उल्लेख गरिएको छ त्यही नै आफ्नो नेमप्लेटमा उल्लेख गर्न पटक पटक भनिएता पनि अटेर गरेको सेनले जनाए ।

(स्वास्थ्य क्षेत्रमा हुनेगरेका हरेक अमर्यादित गतिविधिहरु आगामी दिनहरुमा निरन्तर समाचार सम्प्रेषण गरिनेछ ।)