धनगढी । धनगढी उ–महानगरपालिकाले राहतका नाममा कुहिएको चामल वितरण गरेको पाइएको छ । उप–महानगरपालिकाले खरिद गरेर वितरणका लागि वडाहरुमा पठाएको चामल कुहिएको र किरा परेको भेटिएपछि स्थानीयले फिर्ता गरेका छन् ।

धनगढी उपमहानगरपालिका वडा नम्बर ४ उत्तरबेहडीकी सीता थापाले वडा कार्यालयबाट राहतमा मिलेको चामल कुहिएको भेटिएपछि फिर्ता गरेको बताईन् । ‘हिजो बेलुका राहतमा मिलेको चामल प्याक गरेको थियो । बाहिर कुनै छाप र उत्पादन मिति पनि छैन् । घरमा पुगेर खोलेर हेर्दा पूरै कुहिएको रहेछ,’ उनले भनिन्, ‘चामलमा सेता लामा–लामा किराहरु देखेपछि आज फिर्ता गर्न ल्याएकी हुँ ।’ यस्तै वडा नम्बर ४ कै मञ्जु नाथले पनि राहतमा पाएको चामलमा किरा परेको भेटिएपछि फिर्ता गरेको बताईन् ।

वडा कार्यालयले भने मिलबाट प्याकिङ भएर आएकाले कुनै शंका नगरी सोझै नगरबासीलाई वितरण गरेको दावी गरेको छ । वडा अध्यक्ष दीपक थापाले राहतमा वितरण गरिएको ६–७ कठ्ठा चामल कुहिएको र किरा परेको भन्दै फिर्ता आएको स्वीकार गरे । उनले तत्काललाई वितरणको काम रोकेकाले उप–महानगरपालिकासँग छलफल गरेर अगाडी बढ्ने बताए । थापाका अनुसार उप–महानगरपालिकाले दिएको टोकनका आधारमा मिलबाट चामल ल्याईएर सोझै वितरण गरिएको थियो ।

धनगढी उपमहानगरपालिकाका प्रमुख प्रशासकिय अधिकृत नारायण प्रसाद सापकोटाले राहतका समाग्री आपूर्ती गर्ने जिम्मा धनगढीकै ठाकुर ट्रेड लिंकलाई दिईएको बताए ।

उप–महानगरपालिकाले दुई करोड ६१ लाखमा तीन हजार तीन सय क्वीन्टल चामल, ८ सय क्वीन्टल दाल लगायतका सामग्री आपूर्तिका लागि ठेक्का गरेको थियो ।