कंचनपुर । पश्चिमी सिमानाका गड्डाचौकीबाट नेपाल भित्रिनेको घुइँचो लागेको छ । भारतले कोरोना भाइरस रोकथामका लागि ‘जनता कफ्र्यु’को घोषणा गरेपछि मजदुरीका लागि भारतमा रहेका नेपाली स्वदेश फर्कन थालेपछि सीमामा घुइँचो लागेको हो । गड्डाचौकी नाकाबाट आजमात्रै  १३ हजार भन्दा बढी नेपाल भित्रीएको एक अधिकारीले जनाए ।

नयाँ वर्षमा सुदूरपश्चिमेलीको मौलिक पर्व ‘विसु’ मनाउन भारतमा रहेका नेपाली कामदार ठूलो संख्यामा घर फर्किने गरेका छन् । यसले गर्दासमेत सुदूरपश्चिम प्रदेशको मुख्य प्रवेशद्वार गड्डाचौकी नाकाबाट नेपाल भित्रिनेको संख्या बढ्दै गएको हो । नेपाल भित्रने यात्रुको भिड बढेतापनि कोरोना चेक प्रक्रिया भने पर्याप्त नभएको एक स्थानीयले राजधानी न्युजलाइ जानकारी दिए  ।

नेपाली काम गर्ने दिल्ली, महाराष्ट्र, उत्तराखण्ड, कर्नाटक, गोवा, पन्जाब, हिमाचललगायत ठाउँमा यतिबेला कोरोना भाइरस संक्रमित व्यक्ति भेटिएका छन् । त्यहाँका स्वास्थ्यकर्मीले भारतमा अझै व्यापक मात्रामा कोरोना फैलन सक्ने सम्भावनासमेत देखाएका कारण कोरोनाको संक्रमण हुन सक्ने भन्दै नेपाली स्वदेश फर्किने क्रम बढेको हो । यस्तोमा स्वदेश फर्कने नेपालीमा संक्रमण हुन सक्ने सम्भावना पनि उत्तिकै बढी हुने स्वास्थ्यकर्मी बताउँछन् ।