यो वर्ष केही नेपाली अभिनेता तथा अभिनेत्रीहरुले घरजम बसाएका छन् । गएको मंसिरमा अभिनेत्री ऋचा शर्मा र यही फागुनमा अभिनेत्री रिश्मा गुरुङले लगनगाँठो कसे । यस्तै, शुक्रवार नेपाली फिल्मका लभ बर्डस् प्रियंका कार्की र आयुष्मान देशराज जोशी विवाह बन्धनमा बाँधिए ।

हरेक वर्ष अभिनेता तथा अभिनेत्रीहरु बैबाहिक जीवनमा बाँधिँदा अभिनेत्री रेखा थापाले भने सधैं मिडियाकर्मीबाट विवाहको प्रश्न सामना गर्नुपर्छ । निर्माता छविराज ओझासँग दश वर्ष लामो बैबाहिक सम्बन्ध टुंग्याएपछि एकल जीवन विताउँदै आएकी अभिनेत्री रेखा केही वर्षयता कसैको प्रेममा रहेको फिल्मवृतमा चर्चा छ । उनको विवाहको प्रसङ्ग सञ्चारमाध्यममा निकै नै आएको देखिन्छ । तर, उनले भने यो कुरालाई अफवाह बताएकी छन् ।

शुक्रवार साँझ अभिनेत्री प्रियंका कार्की र अभिनेता आयुष्मान देशराज जोशीको रिसेप्सन पार्टीमा पुगेकी अभिनेत्री रेखा थापालाई पत्रकारले प्रश्न गरे( ‘अब तपाईंको बिहेको कार्ड कहिले छापिन्छ रु’ उनले ठट्यौली शैलीमा ‘छिटै छापिन्छ’ भन्दै जवाफ फर्काइन् । उनले थपिन्, ‘बिहे भनेको लेखान्त हो । जहिले लेखेको छ त्यो बेला केही कुराले पनि रोकिन्न । मैले चाहेर बिहे हुने होइन ।’

निर्देशक रेनशा वान्तवा राईसँग प्रियंका र आयुष्मानको रिसेप्सन पार्टीमा पुगेकी उनले आफ्नो अभिनय र निर्माण रहने नयाँ फिल्मको आउँदो बैशाखबाट छायांकन सुरु हुने पनि बताइन् । फिल्ममा अनुबन्ध भएका अभिनेता द्वय दयाहाङ राई र सौगात मल्लसँग स्क्रिन साझेदारी गर्न आफू निकै उत्साहित रहेको उनको भनाई छ । यो फिल्मलाई सविर श्रेष्ठले निर्देशन गर्दैछन् ।