काठमाडौं- अन्नपूर्ण आधारशिविरको पदमार्गमा गएको हिमपहिरोमा हराएका ४ कोरियाली पर्यटक र ३ नेपाली गाईड खोज्न नेपाली सेनाको टोलीले सम्भावित स्थानमा ५ मिटरसम्म खने पनि कसैलाई फेला पार्न सकेको छैन।

माघ ३ देखि हराइरहेका पर्यटक र नेपाली गाइड खोज्न सेनाले पोखरास्थित सेकेण्ड रेञ्‍जर गणका गणपति सहितको टोली उद्धारमा खटाएको थियो।

सेना माघ ७ बाट खटिएको थियो।

उद्धार टोलीलाई सेनाको ईक्वेरल हेलिकोप्टरद्वारा घटनास्थलबाट करिब २० मिनेटको पैदल दुरीमा छाडिएको थियो।

सैनिक जनसम्पर्क निर्देशनालयका अनुसार उद्धार टोलीले कोरियाली पर्यटकहरु हिम पहिरोमा परी पुरिएको भनिएको स्थानमा करिब ५ मिटर गहिराईसम्म खनेको थियो।

तर केही फेला परेन।

टोलीले नेपाली गाइडले अनुमान गरेको सम्भावित स्थानमासमेत खोजेको थियो।

हराइरहेका नेपाली गाइड खोज्न दुई आफन्तसमेत उद्धार टोलीसँगै छन्।