सत्तारुढ नेकपाले तपाईंलाई उपसभामुखबाट राजीनामा दिन आग्रह गर्ने निर्णय गरेको छ, तपाईं के गर्नुहुन्छ ?

माननीय सदस्यमा निर्वाचित भएपछि मलाई पार्टीले उपसभामुख बनाउने निर्णय गरेकै वेला मैले भनेकी थिएँ, ‘मलाई तपाईंहरूको उपसभामुख पद चाहिँदैन ।’ यो विषयमा मैले नेताहरूसँग अडान नै राखेकी थिएँ । तर, निर्णय गरिसकेका कारण पार्टीलाई अप्ठ्यारो होला भन्ने लागेर केन्द्रीय सदस्य र मोरङ इन्चार्जबाट राजीनामा दिएँ । र, अन्तिम १५ मिनेट बाँकी छँदा उपसभामुखमा उम्मेदवारी दर्ता गराएकी थिएँ । उपसभामुख निर्वाचन भएपछि मैले शपथ लिएकी थिएँ– कसैको डर नमानी उपसभामुखको जिम्मेवारी पूरा गर्छु । म अहिले त्यही शपथलाई टेकेर अघि बढ्ने तयारीमा छु । अर्को कुरा, जहाँसम्म पार्टीले राजीनामा गर्न निर्देशन दियो भन्ने कुरा छ, निर्देशन दियो कि दिएन, के निर्देशन दियो ? अहिलेसम्म मलाई केही जानकारी छैन । औपचारिक रूपमा मलाई भनिएको पनि छैन ।

शनिबार सचिवालयले निर्णय गर्नुअघि नै शुक्रबार दुई अध्यक्षसँग बालुवाटारमा तपाईं पनि छलफलमा बस्नुभएको थियो । त्यहाँ तपाईंलाई सभामुख चयनका लागि बाटो खोल्न राजीनामा दिनुस् भनिएको थिएन र ? 

उहाँहरूले बोलाएर, चाहेर छलफल भएको होइन, मैले नै आग्रह गरेपछि छलफल भएको हो । मैले उहाँहरूलाई बाहिर–बाहिर भनेर  हुँदैन, मलाई औपचारिक निर्णयसहित जानकारी चाहिन्छ भनेको थिएँ । संसद्लाई लामो समय बन्धक बनाउन मिल्दैन, तुरुन्त निकास दिनुस् भनेको थिएँ ।

शनिबार उहाँहरूले निर्णय गर्नुभयो, अब के गर्नुहुन्छ ?

पार्टीले निर्णय के गर्‍यो भन्ने नै मलाई थाहा छैन । फेरि पार्टीका नेताहरूले नै मलाई बारम्बार तपाईंलाई त पार्टीको ह्विप लाग्दैन भन्दै आउनुभएको छ । सभामुख जिताउने हैसियत पार्टीसँग छ । त्यसैले यो दलले जबसम्म उम्मेदवार चयन गर्दैन, तबसम्म मेरो राजीनामा आउने सम्भावना छैन । मैले राजीनामा नगर्नुको कारण बारम्बार बताउँदै आएकी छु– राज्यका तीन अंगमध्ये एउटा महत्वपूर्ण अंग व्यवस्थापिका हो । अहिले प्रतिनिधिसभाको सभामुख पद रिक्त छ । यस्तो अवस्थामा राजीनामा दिएर सभालाई रिक्त बनाउन मिल्दैन ।  सभालाई रिक्त नबनाई सभामुखको निर्वाचन प्रक्रिया अघि बढाउनु मेरो जिम्मेवारी हो । संविधानअनुसार देश र जनताको हितमा काम गर्छु । अन्यायविरुद्ध कसैसँग नडराई लड्छु भन्ने शपथ खाएका कारण पनि मैैले अहिले राजीनामा दिएर प्रतिनिधिसभालाई रिक्त बनाउन मिल्दैन ।

अधिवेशन सुरु भएको २३ दिनपछि आइतबार संसद् बोलाइएको छ, आइतबार संसद् चलाउने तयारीमा हुनुहुन्छ कि राजीनामा दिने मनस्थितिमा ?

राजीनामा दे भनेर नेकपाले मलाई निर्देशन गर्न मिल्दैन । म अहिले त्यो दलको सदस्य पनि होइन । मैले अहिले राजीनामा दिएर प्रतिनिधिसभालाई रिक्त बनाउन मिल्दैन । किनभने, संविधान र कानुनले संसद्को नेतृत्व रिक्त बनाउने परिकल्पना गरेको छैन । संविधानको परिपालना गर्नु मेरो कर्तव्य हो, पदीय मर्यादा हो । त्यसैले अहिलेको अवस्थामा संवैधानिक व्यवस्थालाई परिपालना गर्नैपर्छ ।

तपाईंले अडान कायमै राखेर आइतबार बैठक सञ्चालन गर्नुभयो र सभामुखको निर्वाचनसम्बन्धी कार्यक्रम अघि बढ्यो भने नेकपाले सभामुख पद गुमाउने अवस्था आउँछ भन्ने छ किनकि सभामुख र उपसभामुख एउटै दलको हुने परिकल्पना संविधानले गरेको छैन ।

म त्यो कुरा जान्दिनँ । मलाई पार्टीले केही पनि भनेको छैन ।

तर, तपाईंलाई उपसभामुखमा निर्वाचित गरेको पार्टीले हो, पार्टीको निर्देशन मानेर राजीनामा दिनूस् भन्ने पत्र आएमा के गर्नुहुन्छ ?

यो थाहा पाइराख्नुस्, त्यसरी राजीनामा दिनुस् भन्ने पत्र आयो भने त्यो पत्रमा पार्टीले सभामुखको उम्मेदवार पनि तय गर्‍यो, त्यसैले उपसभामुखले बाटो छोडिदिनुपर्‍यो भन्ने कुरा उल्लेख भएको हुनुपर्छ । यति मात्रै होइन, हटाउनुपर्ने कारण के हो, प्रस्टसँग उल्लेख हुनुपर्छ । के मैले भ्रष्टाचार गरेकी छु ? बदमासी गरेकी छु ? यौन दुराचार गरेकी छु ? पार्टीले त्यो पुष्टि गर्नुपर्छ । त्यसरी पत्राचार गरेको रहेनछ भने मैले किन राजीनामा दिने ? मैले के बदमासी गरेकी छु ? अर्कोले फट्याइँ गर्छ, अनि म भागीदार बन्ने ?