बुटवल\नेपाली कांग्रेसले लुम्बिनी प्रदेशमा संसदीय दलको नेता चयनका लागि तीन सदस्यीय संसदीय दलको नेता तथा कार्यसमिति चयन उपसमिति गठन गरेको छ ।

बुटवलमा बसेको कांग्रेस लुम्बिनी प्रदेश समिति अन्तर्गत कार्यसम्पादन समितिको बैठकले दलको नेता चयन गर्न सहमहामन्त्री खगराज पाण्डेको संयोजकत्वमा तीन सदस्यीय उपसमिति गठन गरेको कांग्रेस लुम्बिनी प्रदेश सभापति अमरसिंह पुनले बताए । विष्णुकुमारी सापकोटा र देवनारायण चौधरी सदस्य छन् ।

लुम्बिनी प्रदेशमा दलको नेता बन्नका लागि कांग्रेसबाट चार जना नेताहरू प्रतिस्पर्धामा देखिएका छन् । केन्द्रीय सदस्य अब्दुल रज्जाक, प्रदेश सरकारका मन्त्रीसमेत रहेका डिल्ली बहादुर चौधरी, वीरबहादुर राना र राजु खनाल प्रतिस्पर्धामा छन् ।

संसदीय दलको नेता छान्न पुस १६ भित्रै प्रक्रिया सुरु गरी सकेसम्म सहमतिमै छनोट गर्ने सभापति पुनले बताए । ‘सकेसम्म सहमतिमै गर्ने प्रयास छ,’ उनले भने, ‘नभए लोकतान्त्रिक विधि र प्रक्रियाबाटै टुंगो लगाउँछौं ।’यस्तै, बैठकले पार्टीका सहमहामन्त्री विष्णु मुस्कानको संयोजकत्वमा तीन सदस्यीय संसदीय दलको विधान निर्माण उपसमिति पनि गठन गरेको छ । मुस्कान संयोजकत्वको उपसमितिमा महेन्द्र पाण्डे र रिना नेपाल सदस्य छन् । उपसमितिले शुक्रबार सम्ममा विधान तयार गर्ने जिम्मेवारी पाएको छ ।