विवेकशील साझा पार्टी छाडेका गोपाल हमालले धनगढी उपमहानगरपालिकाको मेयरमा उम्मेदवारी घोषणा गरेका छन्।

आज धनगढीमा कार्यक्रम गर्दै उनले स्वतन्त्र ढंगले मेयरमा उम्मेदवारी दिने घोषणा गरेका हुन्।

‘म धनगढी उपमहानगरको मेयर पदमा स्वतन्त्र ढंगले उम्मेदवारी दिने घोषणा गर्दछु,’ आज धनगढीमा आयोजित घोषणा सभामा उनले भने।

वैशाख ३० गते हुने स्थानीय तह चुनावमा उनी मेयर लड्ने तयारीमा छन्। हमाल चार वर्षदेखि विवेकशील साझा पार्टीको सुदूरपश्चिम प्रदेश संयोजक थिए।

उनले मंगलबार पार्टीको प्रदेश संयोजक र साधारण सदस्यसमेत त्याग गरेका थिए।

हमाल ०७४ कै स्थानीय तह चुनावमा धनगढीमा स्वतन्त्र ढंगले मेयर उठेका थिए। तर नेपाली कांग्रेसका उम्मेदवार नृपबहादुर बडसँग उनी पराजित भए।

त्यसबेला वडले १४३२४ मत ल्याउँदा हमालले ११ हजार पाँच सय २७ मत ल्याएका थिए। 

उपमहानगरका बासिन्दाले फेरि स्वतन्त्र भएरै उम्मेदवार बन्न सुझाव दिएको भन्दै उनले विवेकशील साझा छाडेको बताएका छन्।

उनले अन्य पार्टीमा प्रवेश नगर्ने पनि बताएका छन्।