संसदमा आज एमसिसी पारित गर्ने तयारी भएसँगै अहिले नयाँ बानेश्वर क्षेत्रमा सुरक्षा व्यवस्थामा कडाइ गरिएको छ।

यसअघि एमसिसी विरोधमा बानेश्वर क्षेत्र तनावग्रस्त भएपछि त्यसलाई मध्यनजर गर्दै सुरक्षा व्यवस्थामा कडाइ गरिएको प्रहरीले जनाएको छ।

‘सुरक्षा संवेदनशीलतालाई ध्यान दिएर हामी अहिले हाइ अलर्टमा छौं’, महानगरीय प्रहरी कार्यालयका प्रवक्ता एसपी सन्तोषसिंह राठौरले भने,‘योभन्दा अघि भएका स्थितिलाई मध्यनजर गर्दै सुरक्षा व्यवस्था मिलाएका छौं।’

अहिले त्यस क्षेत्रमा २४०० हाराहारीमा प्रहरी खटाइएको उनले बताए।

अहिले स्थिति सामान्य नै रहेको उनले बताए। 

दिउँसो १ बजे नयाँ बानेश्वरस्थित संसद भवनमा बैठक बस्दैछ।

आजै दुइटा बैठक बसेर एमसिसी पारित गर्ने सरकारको तयारी छ।

फागुन ८ गते एमसिसी सदनमा टेबल भएको थियो। एमसिसीको विरोधमा प्रदर्शन हुँदै आएका छन्।