काठमाडौं

नेपाली कांग्रेसका नेता प्रदीप पौडेलले आफू देउवा समूहबाट महामन्त्रीमा प्रतिष्पर्धा गर्नुको कारण पार्टीलाई एक ढिक्का बनाउने भएको बताएका छन् । कांग्रेसभित्र बृहत् एकता निर्माण गर्न देउवासँग गएको उनले दाबी गरेका छन् । 

“म कांग्रेसभित्र बृहत् एकता निर्माण गर्न देउवासँग गएको हुँ ।  पहिलो पुस्ताको शेरवहादुर र प्रश्न गर्ने प्रदीप पौडेलको टिम बन्यो भने त्यसले कांग्रेसको दुवै पुस्तालाई संवोधन गर्न सकिन्छ भनेर म देउवाको टिमबाट चुनाव लडेको हुँ,” आफ्ना मतदातालाई धन्यवाद दिन आयोजित चियापान कार्यक्रममा नेता पौडेलले भने, “पहिले पुस्ताका नेता शेरबहादुर देउवाले  मलाई टिममा उमेदवार बनाउनु भयो । त्यसका लागि धन्यवाद छ । कृष्णप्रसाद सिटौला आफैं उमेदवार बन्न सक्नुहुन्थ्यो तर युवा अघि बढाउनुपर्छ भनेर मलाई बनाउनुभयो ।” 

चुनाव हारेर पहिलेभन्दा अझ शक्तिशाली महसूस गरिरहेको उनले बताए । “म निराश छैन । म १४ औँ महाधिवेशनमा महामन्त्री लडेको भनेर भोलिदेखि भन्ने छैन । तपाईँहरू अघि बढ्नुस् पार्टी निर्माणमा साथसाथ हिड्ने छु,” उनले भने, “कांग्रेसलाई ठूलो पार्टी होइन बहुमत प्राप्त दल बनाउनु छ । म काँधमा काँध मिलाएर हिड्न तयार छु ।”

नेपाली कांग्रेसको १४ औं महाधिवेशनमा महामन्त्रीमा प्रतिष्पर्धा गरेका पौडेल पराजित भएका थिए । पराजित भएपछि आफ्ना मतदातालाई धन्यवाद दिन उनले आज काठमाडौंमा चियापान कार्यक्रम आयोजना गरेका हुन् ।