कोहलपुर/केन्द्रिय महाअधिवेशन तयारीमा जुटेको राष्ट्रिय प्रजातन्त्र पार्टीले वडा, नगर तथा निर्वाचन क्षेत्रहरुको अधिवेशनलाई लगभग पूर्णता दिइसकेको छ । राप्रपाको वडादेखि क्षेत्रगत तहसम्म अधिवेशन हुँदै गर्दा पार्टीमा युवाहरुको सक्रिय सहभागिता तथा नेतृत्वसम्म आकर्षण बढ्दै गएको छ । युवाहरु राप्रपा मात्र नभई नेपाली काँग्रेसको वडा तथा क्षेत्रगत अधिवेशनहरुमा पनि त्यत्तिकै आकर्षण बढ्दै गइरहेको देखिन्छ ।

पछिल्लो समयमा युवाहरुमा राजनीतिक चेतनाको विकास हुँदा नेतृत्व लिन आकर्षित भइरहेको विश्लेषण हुँदै आएको छ । यस्तै फरक राजनीतिक आस्था बोकेका प्रभावशाली युवा राप्रपामा प्रवेश गरेका छन् । जाजरकोट जिल्लामा युवाहरुमाझ लोकप्रिय तथा प्रभावशाली सुमन मल्ल (थमन) राप्रपाले अघि सारेको हिन्दु राष्ट्र सहितको संवैधानिक राजसंस्थालाई आत्मसाथ गर्दै कोहलपुरमा राप्रपा प्रवेश गरेका छन् । उनलाई भर्खरै कोहलपुर नगरपालिकाको नगर अधिवेशनबाट निर्वाचित अध्यक्ष अर्जुनजंग शाहको सहजिकरणमा पूर्व मन्त्री तथा राप्रपा नेता प्रेम बहादुर भण्डारीले टिका तथा माला लगाएर राप्रपामा स्वागत गरेका छन् ।

कम्युनिष्ट परिवारमा हुर्केका थमन राजनीतिक विचारका रुपमा यस अघि नेपाली कम्युनिष्ट सिद्वान्तबाट प्रेरित भएपनि विस्तारै राजनीतिक चेतनाको विकास भएसँगै नेपाली कम्युनिष्ट आन्दोलन संसदिय व्यवस्था प्रणालीमा लिप्त हुँदा खोक्रो कम्युनिष्टको सिद्वान्त आम कार्यकर्तालाई लादिरहेको प्रतिक्रिया दिएका छन् । जाजरकोटमा रहँदा युवाहरुमाझ प्रभावशाली छवी बनाएका थमन जाजरकोटबाट बसाइ सरेर कोहलपुर आएसँगै राष्ट्रवादी राजनीतिक सिद्वान्ततर्फ आकर्षित भएको र हालको राप्रपाको विचार तथा सिद्वान्तबाट प्रभावित भएर राप्रपा पार्टी प्रवेश गरेको बताएका छन् ।

पार्टीले थमनको कार्यशुलता र प्रभावलाई उच्च मूल्यांकन गर्दै पार्टीमा महत्वपूर्ण जिम्मेवारी दिने तयारी भइरहेको जानकारी दिएका छन् । युवाहरुलाई राप्रपामा अपनत्वबोध हुने गरी विभिन्न अवसर तथा सच्चा देशप्रेम भावबाट प्रेरित गर्न केन्द्रिय कार्यसमितिलाई विशेष सचेत गराइरहेको कोहलपुर नगर अध्यक्ष शाहको भनाई छ । थमन पार्टीमा प्रवेश गर्ने युवाहरुको प्रतिनिधी पात्र मात्र रहेको अबको केही समयमा ठुलो युवा शक्ति राप्रपामा प्रवेश गर्ने तयारी पनि भइरहेको राप्रपा नेता तथा केन्द्रिय कार्यसम्पादन समिति सदस्य हिक्मत ढकालले बताएका छन् ।