काठमाडौँ, १६ भदौ। बागमती प्रदेशका सामाजिक विकास मन्त्री कृष्णप्रसाद खनालले मुख्यमन्त्री अष्टलक्ष्मी शाक्यको साथ छाडेका छन् । 

भदौ २ गते मन्त्रीको शपथ लिएका एमाले सांसद खनाल मंगलवार नेकपा एकीकृत समाजवादी पार्टीमा लागेका हुन् । 

खनालले मंगलवार हेटौंडास्थित निर्वाचन आयोगमा पुगेर समाजवादी रोज्न सनाखत गरेका हुन् । 

एमाले त्यागेर समाजवादीमा लागे पनि उनले अहिलेसम्म मन्त्री पदबाट राजीनामा भने दिएका छैनन् । खनालसहित १२ सांसदले कित्ता परिवर्तन गरेसँगै मुख्यमन्त्री शाक्य स्पष्ट अल्पमतमा परेकी छन् । 

दल विभाजन भएपछि मुख्यमन्त्रीले प्रदेश सभामा विश्वासको मत लिनुपर्छ । १०९ सदस्यीय प्रदेश सभामा सभामुखसहित एमालेका ५६ सांसद रहेकोमा अब सो संख्या ४४ मा झरेको छ । मुख्यमन्त्रीका लागि ५५ सांसदको समर्थन अनिवार्य हुन्छ ।