कोहलपुर / लामो समय सहकारी क्षेत्रको विकासमा तल्लिन रहेका तेजबहादुर थापाको निधन भएको छ । जिल्लामा सहकारी अभियानका अगुवा भनेर चिनिने थापाको बाँकेको कोहलपुरस्थित घरमै निधन भएको हो । थापा वि.स. २०१६ मा साविकको लाँकुरी गाविस–५ उम गाउँमा हाल डुङ्गेश्वर गाउँपालिका–२ जन्मिएका हुन् ।कोरोना संक्रमणका कारण उनको निधन भएको हो । उनलाई असार १२ गते कोरोना संक्रमण पुष्टि भएको स्वास्थ्य सेवा कार्यालयका निमित्त स्वास्थ्य सेवा व्यवस्थापक थीरप्रसाद रेग्मीले बताए । थापा जिल्लामा सहकारी अभियान्ताको रुपमा चर्चित थिए । सरकारी सेवा रहँदा लेखा अधिकृतको रुपमा काम गरेका थापा पछि सहकारी क्षेत्रलाई मजबुत बनाउन लागिपरेका थिए । जिल्ला सहकारी संघको अध्यक्ष भएपछि थापाले सहकारी संघ बलियो भएपछिमात्रै अन्य सहकारीहरु मजबुत हुन्छन् भन्ने मान्यतासहित व्यवस्थापनमा जुटेका थिए । थापा डुङ्गेश्वर गाउँपालिका–२ लाँकुरीका निर्वाचित वडासदस्य समेत हुन् । वडासदस्य थापाको निधनप्रति डुङ्गेश्वर गाउँपालिकाका अध्यक्ष नगेन्द्रबहादुर मल्लले गाउँपालिकाले एक कुसल राजनीतिककर्मी गुमाएको बताए । गाउँपालिकाको विकास निर्माणमा वडासदस्य थापाको विशेष योगदान रहेको अध्यक्ष मल्लको भनाई छ । ६१ बर्षीय थापा नेकपा एमाले दैलेखको लेखा आयोगका संयोजक समेत हुन् ।
‘सहकारी संघ सहित अन्य सहकारीको आर्थिक व्यवस्थापनमा उहाँले महत्वपूर्ण योगदान दिनुभएको छ,’ राष्ट्रसेवक सहकारी बहुउद्देश्यीय सहकारी संस्थाका व्यवस्थापक भुपेन्द्रकुमार खड्का भन्छन् । सहकारी संघमा उहाँले नेतृत्व लिएपछि सहकारी संस्थालाई मजबुत बनाउन तालिम लगाएतका अभियाननै थालनी भएको उनि सम्झन्छन् । थापाले शिवालय सहकारी संस्था मार्फत कृषि फर्म नै सञ्चालन गरेका छन् । थापाको पार्थिव शरिरलाई बिहिबार राप्तीसोनारी गाँउपालिका अगैयामा हिन्दु परम्परा अनुसार दाससस्कार गरिएको छ ।