काठमाडौं । काभ्रेपलाञ्चोकमा ग्यास लिक भई आगलागी हुँदा ५ जना घाइते भएका छन । जिल्लाको बनेपा नगरपालिका–७ मा रहेको तरकारी बजारमा उक्त घटना भएको हो । रुकेश ठकुरीको तीन तले घरको तेस्रो तलामा रहेको भान्छामा आज बिहान ग्यास लिक भई आगलागी हुँदा घरधनी २६ वर्षीय रुकेश ठकुरी, उनका श्रीमती २४ वर्षीया शोफिया ठकुरी र डेढ वर्षीया छोरी रचना ठकुरीका साथै उनका आफन्त १६ वर्षीय आयुश ठकुरी र मनिष शाह ठकुरी घाइते भएको इलाका प्रहरी कार्यालय बनेपाका प्रहरी निरीक्षक योगेन्द्र तिमिल्सिनाले जानकारी दिए ।

घाइतेहरुको उद्धार गरी उनीहरुलाई थप उपचारका लागि अस्पताल रिफर गरिएको प्रहरीले बताएको छ । उनीहरुको थप उपचारका लागि काठमाडौंको कीर्तिपुरमा रहेको वर्न सेन्टरमा सम्पर्क गरिएको प्रहरीले जानकारी दिएको छ । हाल उनीहरुको अवस्था मध्यम रहेको बताइएको छ ।

प्रहरीका अनुसार कोठामा चुरोट सल्काउने क्रममा आगलागी भएको हो । ग्यासको पाइपबाट ग्यास चुहिएको अवस्थामा चुरोट सल्काउँदा उक्त घटना भएको बुझिएको छ । आगलागीबाट कोठा पूर्ण रुपमा क्षति भएको प्रहरीले बताएको छ ।