कस्तुरीलाई हिमालको शिरमा चर्न देऊ,
नेपालीलाई नेपालको निम्ति मर्न देऊ।

नालापानीमा नेपाल अङ्ग्रेज युद्ध हुँदा नरे कार्कीले भनेको यो पङ्क्ति आज झट्ट याद आयो। हाम्रा वीर पुर्खाहरूले पानी पनि नखाई प्याक प्याक हुँदै बचाएको देश नेपाल। तर पनि नेपाल र नेपालीका लागि अपमानजनक सुगौली सन्धि पश्चात् पश्चिममा काली नदी अनि पूर्वमा मेची नदी सम्म सीमा कायम भयो। सन् २०१५ मा भारत र चीनले नेपालको सहमतिविना लिपुलेक हुँदै दुई पक्षीय नाका बनाउने सहमति गरे। त्यसपश्चात् सन् २ नोभेम्बर २०१९ मा भारतले आफ्नो राजनैतिक नक्सामा नेपालको भूमि लिम्पियाधुरा, लिपुलेक अनि कालापानी सहित नक्सा जारी गर्‍यो। अहिले आएर बाटो खनेर उद्घाटन गरेपछि हामी नेपालीको चर्को विरोध पछि भारतले भन्यो त्यो भूमि हाम्रो हो।

मेरो देशका चिर निद्रामा रहनुभएका प्रधानमन्त्रीले भन्नुभयो सिमासम्वन्धी कुरो पत्रपत्रिकामा आएपछि थाहा पाएँ। तपाइका परराष्ट्रविद्हरू कुन आराम कुर्सीमा आराम गरिरहेका छन्। मेरो प्रधानमन्त्रीजी लाई सिमाना मिचिदा अनि छिमेकीको बुट नेपाल आमाको छातीमा बजारिदा पनि थाहा छैन भने के थाहा छ तपाईँलाई। त्यसैसरि प्रतिपक्षी दलका शीर्ष नेता ज्यु को गृह जिल्लाबाट केही कोश टाढा छ सीमा मिचिएको क्षेत्र। उहाँको पहल कदमी चालेको खोइ? २३ जिल्लाका विभिन्न ठाउँमा सीमा मिचिएको छ। त्यसैसरि अर्को दिन चिनीया मिडियाले समरमाथा चीनमा पर्छ भनेर छाप्दा समेत हाम्रो सरकार चुपचाप छ।

अरे हाम्रो देश नेपाल काँक्रो हैन चिराचिरा पारेर लुट्नलाई, देश त आज मेशमा काट्न राखिएको खसीजस्तै भएको छ फिला काटेर एकले लग्ने अनि खुट्टी काटेर अर्कोले। विडम्बनाको कुरो नेपालको निशाना छापमा रहेको नेपालको नक्सा,संसद्को रोस्टमको लोगोमा रहेको नेपालको नक्सामा समेत समेटिएको छैन लिम्पियाधुरा, लिपुलेक अनि कालापानी। त्यसैले शङ्का लाग्छ यो जमिन बेचिएको हो कि मिचिएको। त्यति मात्र हैन रोटिवेटिको सम्वनध भन्दै सन्धिको जालझेल अनि नाकाबन्दीको तालमा हामी रनभुल्ल पारेर मैले सुने अनुसार नेपालको ७७ ठाउँमा सीमा अतिक्रमणमा परेको छ।

सीमा सुरक्षामा खटिनु पर्ने नेपाली सेनालाई कुटो कोदालो बोकेर विकास निर्माण र ठेक्कापट्टा गर्न ठिक्क छ।भारतीय सीमा सुरक्षा बलले आएर काममा रोक लगाएपछि हामीले पाँचथरमा काम रोक्यौँ। अब आफ्नो मातृभूमिमा हामीले अरू देशको आदेश पालना गर्नुपर्ने। यहाँकी सांसद सरिता ठाकुर भन्नुहुन्छ भारतलाई नसोधेर नयाँ नक्सा जारी नगरौँ। अब भारत र चिनले नेपालको सहमतिबिना नेपाली सीमा मिचेर भारतले नक्सा निकाल्न हुने। हामीले हाम्रो भूमि समेट्न अरू देशको सहमति खोज्नु पर्ने कस्तो कुरा हो यो। हाम्रो सार्वभौमसत्ता भारतलाई बेचेका छैनौँ हामी नेपाली जनताको हातमा छ।

त्यसैले मिचिएको सम्पूर्ण भूमि समेटेर तुरुन्त नक्सा सार्वजनिक गरियोस्। अनि कोही यस्तो अवस्थामा पनि १०+१ प्रदेश खोजी रहेका छन्। केही राजनैतिक दलहरू पुनः राष्ट्रवादलाई नारा बनाएर मत प्राप्त गर्नलाई पर्खिरहेका छन्। परराष्ट्र मन्त्रीज्यूलाई यस्तो संवेदनशील विषयमा छलफल गरेर समाधान खोज्न कालागि समय छैन। कालापानी क्षेत्रबाट झन्डै-झन्डै १७-१८ कि.मी टाढा सिमाचौकी राखेर सिमासम्वन्धी समाधानको पहल हो कि जनतालाई भ्रममा पार्ने काम हो। यो त रोगको औषधि शरीरमा पठाउनुपर्ने छ भने मुखमा छुवाएर हुँदैन मुखबाट निल्नुपर्छ।त्यसैले अव दीर्घकालीन समाधानको उपायमालागि खुला सीमा बन्द गरी तुरुन्त भारतीय र चिनीया सीमामा तारजाली सहित पर्खाल लगौँ। अनि हामी नेपाली एकताबद्ध भएर सीमा जोगाउन लागौँ। जय मातृभूमि जय देश जय नेपाल जय स्वाभिमान।

लिम्पियाधुरा, लिपुलेक कालापानी, टनकपुर, सुस्ता हाम्रो हो ।