काठमाडौँ। काठमाडौं महानगरपालिकाभित्र सरसफाई क्षेत्रमा काम गर्ने व्यक्तिहरुको कोरोना परिक्षण गरिएको छ । पछिल्लो समय काठमाडौंमा कोरोना संक्रमितको संख्या बढेसँगै काठमाडौं महानगरपालिकाका सफाइ कर्मचारी र फोहोरमैला संकलन गर्नेहरुमा आरडीटी र पीसीआर विधिबाट परीक्षण गर्न लागिएको हो ।

देशभरि कोरोना सङ्क्रमितको सङ्ख्या बढ्दै गएपछि सरकारले उपत्यकामा १० हजारको कोरोना परीक्षण गर्ने लक्ष्य लिएको छ । सो लक्ष्य अनुरुप शुक्रबार काठमाडौंको टेकुमा उनीहरुको लागि स्वाब संकलन गरिएको हो ।

बजार क्षेत्रभित्र प्रत्यक्ष रुपमा कृषि वस्तुको खरिद बिक्रीमा संलग्न हुने व्यवसायी, व्यवसायीका सहयोगी, ढुवानीमा संलग्न हुने चालक, सहचालक, भरिया, सरसफाइ मजदुर, सुरक्षाकर्मी र कर्मचारी गरी ६ सय जनाको नमुना सङ्कलन गरिएको हो ।

‘परीक्षणका लागि लाइनमा बसेका पहिलो व्यक्तिमा पीसीआर विधिबाट र दोस्रो, तेस्रो र चौथो व्यक्तिलाई आरडीटीबाट कोरोना परीक्षण गराइएको छ’ ‘त्यस्तै पाचौं व्यक्तिलाई पीसीआर विधिबाट परीक्षण गरेको र यसैगरी ८ सय जनाको परीक्षण गराउन लागेका छन । महानगरले बिहीवार कालीमाटी फलफूल तथा तरकारी बजारमा एक हजार ३४ जनाको कोरोना परीक्षण गरेको थियो । जसमा आरडीटीबाट परीक्षण गराएका ४ जनाको भने कोरोना पोजेटिभ देखिएको थियो ।

आरडीटीमा पोजेटिभ देखिएसँगै महानगरले तत्काल पीसीआर विधिबाट परीक्षण गराएको थियो । त्यसको रिपोर्ट आउन बाँकी छ ।