काठमाडौं । सरकारले आज संघीय संसदमा नीति तथा कार्यक्रम प्रस्तुत गर्दैछ । राष्ट्रपति विद्यादेवी भण्डारीले आज अपरान्ह ४ बजे दुबै संसदको संयुक्त बैठकमा सरकारका नीति तथा कार्यक्रम प्रस्तुत गर्ने कार्यसूची तयार भएको संसद सचिवालयले जानकारी दिएको छ । तर सरकारको नीति तथा कार्यक्रममा संसदमा १३ जना सांसदहरुले प्रवेश गर्न पाउने छैनन ।

संसद सचिवालयका सूचना अधिकारी दशरथ धमलाका अनुसार प्रतिनिधि सभाका ११ जना र राष्ट्रिय सभाका २ जना गरी १३ जना सांसद सहभागी हुन नपाउने बताइएको छ ।

“कोभिड १९ को पीसीआर विधिबाट परीक्षण नगर्नु भएका सांसदहरु संसदको बैठकमा सहभागी हुन पाउनुहुन्न,” उनले भने, ‘प्रतिनिधि सभाका ७ जना, राष्ट्रियसभाका दुई जना सदस्यको पीसीआर जाँच नभएकोले उहाँहरू सहभागी हुन पाउनुहुन्न ।’ प्रतिनिधि सभाका नरमाया ढकाल, किशोरसिंह राठौर, जयकुमार राई, कुमारी थेबे, रुबी नाज, सूर्यबहादुर केसी र नागेन्द्र कुमार नीति तथा कार्यक्रम प्रस्तुत भइरहँदा संसद बैठकमा सहभागी हुने छैनन ।

यस्तै राष्ट्रियसभाका राधेश्याम पासवान र नरपति सुनुवार पनि नीति तथा कार्यक्रममा सहभागी हुन पाउने छैनन् । उनीहरु काठमाडौं बाहिर रहेकोले कोरोना परिक्षण हुन पाएको थिएन । प्रतिनिधि सभाका चार जना सांसदहरु भने विभिन्न मुद्धाका कारण निलम्बनमा परेका छन् ।

विजयकुमार गच्छदार, मोहम्मद अफताव आलम, रेशमलाल चौधरी, हरिनारायण प्रसाद रौनियार गरी चार सांसद निलम्बनमा छन् । सरकारले नीति तथा कार्यक्रम प्रस्तुत गरिरहँदा संघीय संसद भवनमा ३२० जना सांसदहरु मात्रै उपस्थित हुनेछन् ।

नीति तथा कार्यक्रममा सहभागी हुने सबै सांसदहरुको स्वास्थ्य मन्त्रालयले स्वाब संकलन गरिसकेको छ ।