काठमाडौं । नेपाल कम्युनिस्ट पार्टी (नेकपा) का नेता तथा अन्तर्राष्ट्रिय सम्बन्ध समितिका सदस्य भीम रावलले नेपाल सरकारले आफ्नो भूमि राखेर नक्सा सार्वजनिक नगरेकोमा गम्भीर आपत्ति जनाएका छन् ।

नेपालको भूमि राखेर भारतले ७ महिना अघि नक्सा सार्वजनिक गरेको सन्दर्भमा सरकारले भने अहिलेसम्म पनि नक्सा सार्वजनिक नगरेको भन्दै उनले आपत्ति जनाएका हुन् । भारतले एकतर्फी रुपमा मानसरोवार जाने बाटो खुलाएपछि पुनः विरोध भइरहेको सन्दर्भमा पूर्व उपप्रधानमन्त्रीसमेत रहेका रावलले तत्काल नक्सा जारी गर्न माग गरेका छन ।

‘भारतले हाम्रो भूमि राखेर नक्सा सार्वजनिक गर्ने अनि नेपालले आफ्नो भूमि समेटेर नक्सा सार्वजनिक गर्न प्राविधिक मानिस नभएको हो ?’ उनले प्रश्नसमेत गरेका छन । उनले समितिले विगतमा दिएका निर्देशन पालना नभएकोमा आपत्ती जनाएका छन् । सरकारले हस्ताक्षर बिहीन वक्तव्य जारी गरेकोमा समेत उनले आपत्ति जनाएका छन् ।

उनले अहिले पनि भारतले नेपालको ६० हजार किलोमिटर जग्गा मिचेको बताएका छन् । अहिले भारततसँग जोडिएको १८०५ किलोमिटर मध्ये ६०६ किलोमिटर विवाद रहेकोले समाधान गर्न नेता रावलले आग्रह गरेका छन् । पछिल्लो समय भारतले मानसरोवर जाने बाटो नेपालको सीमाना मिचेर बनाएकोमा सबैले यसको विरोध गर्दै आएका छन ।