काठमाडौं । बहुपक्षीय कर्जादाता निकाय ‘एशियाली विकास बैंक’ (एडीबी)ले कोरोना भाइरसको महामारी नियन्त्रणमा विकासोन्मुख देशहरूलाई टेवा दिन ल्याएको राहत प्याकेजको आकार तेब्बर बनाएको छ । बैंकले यसअघि मार्च १८ मा साढे ६ अर्ब डलरको प्याकेज ल्याएको थियो । तर सोमवार भने सो प्याकेजमा १३ अर्ब ५० करोड डलर थपेको बैंकद्वारा जारी विज्ञप्तिमा उल्लेख छ । योसँगै राहत प्याकेजको आकार बढेर २० अर्ब डलर पुगेको छ ।

उक्त प्याकेजमा साढे २ अर्ब डलर छूट र अनुदान स्रोत समेत रहेको छ । ‘महामारीले एशिया–प्रशान्त क्षेत्रमा आर्थिक, सामाजिक र विकास वृद्धिमा भएको प्रगतिमा धक्का लगाएको छ, गरीबी निवारणमा भएको प्रगति उल्ट्याएको छ र अर्थतन्त्रलाई मन्दीमा पुर्‍याएको छ,’ एडीबीका अध्यक्ष मासासुगु आसाकावाले भने । यस्तोमा महामारीले उत्पन्न चुनौती र आर्थिक मन्दी समाधान गर्न बैंकले विकासोन्मुख सदस्य देशहरूलाई दिन लागिएको तत्कालीन शीघ्र, लचिलो बृहत् सहयोग प्याकेज विस्तार गरेको उनको भनाइ छ । 

नयाँ प्याकेजमा बैंकको ‘काउन्टरसाइक्लिकल सपोर्ट फ्यासिलिटी’ अन्तर्गत कोभिड–१९ पान्डेमिक रेस्पोन्स अप्शन विकास गर्ने योजना समेत रहेको छ । १३ अर्ब डलरसम्मको रकम यही नयाँ अप्शनबाट विकासोन्मुख देशका सरकारलाई मद्दत गर्न उपलब्ध गराइनेछ । बैंकले धेरै ध्यान भने गरीब र सबैभन्दा नाजुक अवस्थामा रहेका देशहरूलाई दिनेछ । मेडिकल सामग्री र व्यक्तिगत सुरक्षा वस्त्र लगायत अन्य आपूर्तिको खरीदका लागि आवश्यक रकम बढाउन अनुदान स्रोतहरू समेत शीर्ष वितरण गरिनेछ । २० खब डलरबाट २ अर्ब डलर भने निजीक्षेत्रका लागि समेत उपलब्ध गराइनेछ । व्यापार र आपूर्ति शृंखला पुनर्जीवित गर्न वित्तीय संस्थाहरूलाई पनि कर्जा र प्रत्याभूति दिइनेछ । 

उच्च तरलता अभावको सामना गरिरहका साना तथा मझौला आकारका उद्योगका लागि लघुवित्त कर्जा र प्रत्याभूति टेवा बढाइने समेत बैंकले बताएको छ । महामारीका कारण यस वर्ष एशियाको आर्थिक वृद्धिदरमा उच्च कमी आउने बैंकको पछिल्लो प्रक्षेपणले देखाएको छ । यो समाचार आजको आर्थिक अभियान दैनिकमा प्रकाशित छ ।