आत्मदाह गर्दा मान्छेले आफ्नो जिउमा आफै आगो लगाएको त सुनिएकै हो । यसरी जिउमा आगो लगाउँदा आगोको श्रोतबाट आगो बालेर जिउमा झोस्नुपर्छ । तर भारतमा एक जना यस्ता बच्चा छन् जसको जिउमा आफै आगो बल्छ ।भारतको तमिलनाडुमा रहेका तिन महिनाका राहुल नामका बालकमा यस्तो भयानक, दर्दनाक तथा अनौठो रोग छ । सुन्दै आङ सिरिङ्ग हुने रोग हो त्यो । उनको शरीरबाट आफै आगोको ज्वाला निस्किन्छ र ह्वारह्वार्ती आगो बलेर आफैलाई जलाउन थाल्छ ।

उनी जन्मेको नौ दिनमै यस्तो रोगको लक्षण पहिलो पटक देखा परेको हो । तिन महिनाको भइसक्दा अहिलेसम्म उनको शरीरमा चार पटक आफै आगो लागिसकेको छ । यसरी शरीरमा आफै आगो लाग्दा उनको शरीर नराम्ररी डढेको छ र उनको अहिले गम्भीर अवस्थामा चेन्नइको किल्पक मेडिकल कलेज अस्पतालमा उपचार भइरहेको छ ।अस्पतालमा डाक्टरहरूका अनुसार आफ्नो शरीरमा आफै आगो दन्किने ती बालकको रोगको नाउँ स्पन्टेनियस ह्युमन कम्बसन डिसअर्डर -एसएचसी) हो । उनको शरीरको छालाका छिद्रहरूबाट निकै प्रज्वलनशील ग्यास निस्किन्छ ।

जसका कारण त्यो ग्यासबाट आगो पैदा हुन्छ । त्यो ग्यास के हो भन्ने कुराको पत्तो भने अझै पाउन सकिएको छैन । केही डाक्टरहरूका अनुसार यस्ता रोगीहरूको रगतमा केही मात्रामा अल्कोहल समेत हुन्छ ।स्मरण रहोस् यस्तो रोग निकै नै दुर्लभ रोग हो । पहिलो पटक यस्तो रोग इटालीको सेसेनामा सन् १७३१ मा देखा परेको थियो । त्यस्तै १९९५ मा बेलायतमा एक जना ७३ वर्षे मानिसको यस्तै रोगबाट ज्यान गएको थियो ।