काठमाडौं । प्रमुख प्रतिपक्षी दल नेपाली कांग्रेसकी सांसद डा. डिला संग्रौला पन्तले स्वदेश तथा विदेशमा रहेका महिला दिदी बहिनीहरुलाई ११० औं अन्तराष्ट्रिय नारी दिवसको शुभकामना व्यक्त गरेकी छन् ।

अन्तर्राष्ट्रिय नारी दिवसका अवसरमा आज जारी गरेको शुभकामना सन्देशमा उनले नेपाल अहिले पनि महिलामाथि हुने विभेद र हिंसाका घटनाबाट मुक्त हुन नसकेको, गाउँशहरमा आज पनि महिलाहरु शोषण, दमन र उत्पीडनबाट आक्रान्त रहेका, महिलामाथि हुने विभेद र हिंसाकाविरुद्ध नारी जागरण आजको आवश्यकता भएको बताएकी छन् ।

उनले अन्तर्राष्ट्रिय श्रमिक महिला दिवसको ‘नारा समानताको पुस्ता, अन्त गरौं हिंसा, विभेद र असमानता लाई व्यबहार मा कार्यान्वयन गर्दै राष्ट्र निर्माण को महान अभियानमा महिला को समान सहभागिता’ भन्ने नारालाई अंगिकार गर्दै माहिलामाथि हुने हरेक प्रकारका हिंसा अन्त्य हुनुपर्ने बताएकी छन् ।

‘महिलामाथिको लैङ्गिक हिंसा, बलात्कार , बोक्सी ,दाइजो, छाउपाडी जस्ता प्रथाको अन्त्य गर्नुपर्छ । तब मात्र माहिला विरुद्ध हुने भेदभाव असमानता ,न्याय , शान्ती र विकासका लागि महिलाहरुले गरेको संघर्ष ले पूर्णता पाउँछ’, उनले भनेकी छन् ।

हिंसा लोकतन्त्र र जनताको सम्प्रभुतामाथिको सबैभन्दा ठूलो खतरा मात्र नभएर मुलुकको आर्थिक प्रगतिको सबैभन्दा ठूलो बाधक भएको बताउँदै सांसद संग्रौलाले सामाजिक एकता र सद्भावलाई कमजोर बनाउने कारण पनि हिंसा भएको सन्देशमा उल्लेख गरेकी छन् ।