केही समय अगाडि सामाजिक सञ्जालमा पाकिस्तानी महिला आजमा अजीजले एउटा भिडियो पोष्ट गर्दै आफ्ना पतिले आफूलाई उनका साथीहरूका अगाडि जबर्जस्ती नाँच्न लगाएको र आफूले नाँच्न नमानेपछि कपाल मुण्डन गरिदिएको बताइन् ।

उनले सामजिक सञ्जालमा लेखेकी छन्, ‘उसले मलाई दैनिक अत्यन्त धेरै पीडा दिन्थ्यो, पिट्थ्यो । तर, यसपटक त उसले मेरो सबै कपाल नै खौरिदियो ।’

त्यस्तै उनले सोही पोष्टमा आफ्ना पतिको चरम दमन र अत्याचारका बारेमा उल्लेख गर्दै लेखेकी छन्, ‘मलाई नोकरका अगाडि मलाई नाङ्गै बनायो । नोकरलाई समात्न लगायो र मेरो कपाल काटिदियो । उसले ममाथि यति ठूलो अत्याचार गरेको छ कि म बताउन पनि सक्दिनँ । मलाई आफैंलाई थाहा छैन म त्यहाँबाट अर्को दिन कसरी निस्किएँ ।’

आफूमाथि भएको अत्याचारबारे प्रहरीमा जाँदा प्रहरीहरूले आफूसँग पैसा मागेको उनले लेखेकी छन् । ‘मसँग पैसाको थिएन । मेरो अनुरोध हो कि— सहयोग गरिदिनुस् ।’