काठमाडौं । हसिम अन्सारीको उत्कृष्ट प्रदर्शनमा प्रदेश नम्बर २ ले जारी मनमोहन मेमोरियल (एमएम) कप एकदिवसीय राष्ट्रिय क्रिकेटको प्रतियोगितामा विजय सुरुआत गरेको छ ।

समूह बीअन्तर्गत बिहीबार भएको खेलमा कर्णाली प्रदेशमाथि ८ विकेटको नतिजा निकाल्दै प्रदेश २ ले विजय सुरुआत गरेको हो । प्रदेश २ को जितमा हसिम अन्सारीले अर्धशतक बनाए । इनरुवा रंगशालामा १ सय २९ रनको लक्ष्यसहित जवाफी ब्याटिङ थालेको प्रदेश २ ले २२ दशमलब ५ ओभरमा २ विकेटको क्षतिमा लक्ष्य भेटाएको हो ।

प्रदेश २ को जितमा हसिमले अर्धशतकिय पारी खेले । ७३ बल खेलेका उनले ११ चौका र १ छक्काको मदतमा ८० रन बनाए । सुरज पटेलले ३३ रन बनाए । हरीशंकर शाहले ५ रन बनाउँदा सुधिर चौधरीले २ रन बनाए ।

कर्णालीका दिनेश अधिकारी र अनुज चुनाराले १–१ विकेट लिए । यसअघि पहिला ब्याटिङ गरेको कर्णाली प्रदेशले ३१ दशमलब ५ ओभरमा अलआउट हुँदै १ सय २९ रन बनाएको थियो । कर्णालीका लागि रविन्द्र शाहीले ४६ रन बनाए । दिवन पुनले २३ रन बनाउँदा प्रकाश जैसीले १५ तथा विपिन रावलले १० रन जोडेका थिए ।

७ खेलाडीले दोहोरो रन बनाउन सकेनन् । प्रदेश २ का मेहबुब आलमले ३ विकेट लिए । हरीशंकर शाह र अदिल अन्सारीले २–२ विकेट लिदाँ कुमार थापाले १ विकेट लिए ।  प्रदेश २ को जितमा नायक बनेका हसिम म्यान अफ द म्याच भए । उनले ३५ सय रुपैयाँ पुरस्कार पाए ।