काठमाडौं। प्राइम कमर्सियल बैंक र कैलाश विकास बैंकले मर्जरको विशेष प्रस्तावसहित पुस २५ गते वार्षिक साधारणसभा डाकेका छन्। प्रामइमले कैलाश विकास बैंकलाई एक बराबर ०.९४ प्रतिशत शेयर अनुपातमा प्राप्ति गर्ने भएको हो।

दुवैले छुट्टाछुट्टै ठाउँमा एकैपटक साधारणसभा गर्ने भएका हुन्। प्राइमको सञ्चालक समितिले यस अगाडि घोषणा गरेको १६ प्रतिशत बोनस शेयरको प्रस्ताव बाह्रौ वार्षिक साधारणसभामा पेश गर्नेछ। बैंकको हालको चुक्ता पुँजी १० अर्ब ८ करोड रूपैयाँ कायम हुनेछ।

मर्जर समिति र चल अचल सम्पत्ति तथा दायित्व मूल्यांकन प्रतिवेदनअनुसार तय भएको स्वाप रेसियो साधारणसभामा पेश हुनेछ।

बैंक बीचमा भएका सबै सम्झौता साधारणसभाले अनुमोदन गरेपछि बैंकले प्राप्तिको कानुनी प्रक्रिया अगाडि बढाउने छ। बैंकले घोषणा गरेको लाभांश पुस १३ गतेसम्म कायम शेयरधनीहरूले प्राप्त गर्न सक्नेछन्। साधारणसभा प्रयोजनका लागि पुस १४ गते एक दिन बुक क्लोज हुनेछ।

त्यस्तै कैलाश विकास बैंकले पुस २५ गते आफ्नो नाममा अन्तिम अर्थात २६ औं वार्षिक साधारणसभा बोलाउने छ। साधारणसभामा चुक्ता पुँजीको २.७७ प्रतिशत नगद लाभांश दिने प्रस्ताव पेश गरिनेछ। बैंकले पुँजीको १६ प्रतिशत बोनस शेयरको प्रस्ताव गरेको छ। हाल बैंकको चुक्ता पुँजी २ अर्ब ५२ करोड रूपैयाँ छ। बोनस शेयरपछि बैंकको पुँजी २ अर्ब ९२ करोड रूपैयाँ पुग्नेछ।

मर्जरपछि प्राइम बैंकको अवस्था 

स्वाप रेसियोको आधारमा बोनस शेयरपछि कैलाश विकास बैंकको पुँजी २ अर्ब ७४ करोड रूपैयाँ हुनेछ। यो पुँजी प्राइम बैंकको पुँजीमा जोडिने छ। बोनस शेयरपछि कामय हुने प्राइमको पुँजीमा उक्त स्वाप रेसियो पछिको पुँजी जोडिँदा १३ अर्ब ५५ करोड रूपैयाँ कायम हुनेछ। स्वाप रेसियो पछि उब्रिएको पुँजी १७ करोड ५४ लाख रूपैयाँ प्राइमको जगेडामा जोडिने छ।

प्राइमको जगेडा कोषमा ८ अर्ब ५ करोड रूपैयाँ छ भने कैलाशको ३ अर्ब २० करोड रूपैयाँ छ। मर्जरपछि जगेडा कोषमा ११ अर्ब २५ करोड रूपैयाँ पुग्नेछ।

हाल प्राइमसँग ७८ अर्ब ५९ करोड रूपैयाँ निक्षेप छ भने कैलाशसँग २७ अर्ब ८३ करोड रूपैयाँ छ। मर्जपछि प्राइमको एक खर्ब ६ अर्ब रूपैयाँ निक्षेप पुग्नेछ। त्यस्तै प्राइमको हाल ऋण लगानी ७९ अर्ब १३ करोड रुपैयाँ ऋण लगानी छ भने कैलाशको २२ अर्ब २७ करोड रुपैयाँ ऋण लगानी गरेको छ।

मर्जपछि प्राइमको ऋण लगानी एक खर्ब एक अर्ब रूपैयाँ पुग्नेछ। यस अगाडि प्राइमको निक्षेप भन्दा ऋण लगानी धेरै थियो।

हाल प्राइमको दोस्रो बजारमा २ सय ८० रूपैयाँमा खरिद बिक्री भइरहेको छ। गत साउनमा मर्जरको सम्झौता गरेपछि कैलाशको कारोबार बन्द छ। कारोबार बन्द हुनु अगाडि बैंकको बजार मूल्य २ सय ३८ रूपैयाँ थियो। यसले कैलाश विकास बैंकका शेयरधनीलाई केहि फाइदा हुनेछ।

प्रतिशेयर आम्दानीको हिसाबले प्राइमको २७ रूपैयाँ छ भने कैलाशको पनि २७ रूपैयाँ नै छ। प्राइमले राम्रो व्यवसाय गरिरहेको कैलाशलाई प्राप्ति गरि आफ्नो वित्तीय अवस्था केहि हदसम्म सुधार गर्ने देखिन्छ।

कैलाश विकास बैंकको हाल उपत्यकाभित्र २५ वटा र उपत्यका बाहिर ७६ वटासहित १०१ वटा शाखा कार्यालय छन्। त्यस्तै प्राइमको उपत्यका भित्र २४ वटा शाखा र उपत्यका बाहिर ७५ वटा सहित ९९ वटा शाखा कार्यालय छन्।

नेटवर्कका हिसाबले प्राइमले आफ्नो भन्दा ठुलो नेटवर्क भएको बैंकलाई प्राप्ति गर्ने भएको हो। प्राप्तिपछि प्राइमको नेटवर्क २०० वटा पुग्नेछ।