सुनको मुल्यले बुधबार पुन नयाँ रेकर्ड कायम गरेको छ ।
मंगलबार सामान्य घटेको सुनको मुल्य बुधबार आएर फेरी उकालो लागेको हो । मंगलबार प्रतितोला ७५ हजार ५ सयमा कारोबार भएको सुन एकैदिन एक हजार रूपैयाँले बढेर ७६ हजार ५ सय पुगेको नेपाल सुनचाँदी व्यवसायी महासंघले जानकारी दिएको छ ।

महासंघका पूर्व अध्यक्ष तेजरत्न शाक्यले अमेरिका र इरानबीचमा भएको द्वन्द्वका कारणले सुनको मुल्य अकासिन पुगेको बताए । अन्तर्राष्ट्रिय बजारमा सुनको मुल्य प्रतिऔंस एक हजार ६ सय डलर पुगेपछि स्थानीय बजारमा तोलामा ८० हजार पुग्ने उनको भनाइ छ ।
एक सातादेखि निरन्तर उकालो लागेको मुल्य मंगलबार भने केही घटेको थियो, तर बुधबार फेरि उकालो लाग्दै हालसम्मकै उच्च मूल्य कायम भएको हो । लगातार मूल्य बढ्दा सुनको कारोबार नै ठप्प भएको छ । अमेरिका र इरानबीच बढ्दो तनावपछि शुक्रबारदेखि विश्व बजारमा सुनको मुल्यमा उच्च वृद्धि देखिएको छ । सोही असर नेपाली बजारमा पनि परेको व्यवसायीको भनाइ छ ।
सुनको मुल्य लगातार बढ्दै गएपछि व्यवसायी ‘पर्ख र हेर’को अवस्थामा रहेका छन् । अहिले बजारमा सुनको कारोबार शून्य अवस्थामा पुगेको व्यवसायी बताउँछन । सामान्य अवस्थामा दैनिक ३० देखि ३५ किलो सुनको कारोबार हुने गरेकोमा अहिले अहिले मुस्किलले दिनमा १० किलो सुन बिक्री हुने गरेको शाक्यले बताए । अस्वभाविक मुल्य बढेपछि ग्राहकहरु सुन खरिद नगरी मुल्य सोधेर मात्र फर्किन गरेको व्यवसायीको भनाइ छ । मुल्य बढेका कारण अहिले खरिद गर्ने भन्दा पनि बिक्री गर्ने ग्राहकको संख्य बढी रहेका छन् । लगातार रुपमा सुनको मुल्य बढ्दै गएपछि व्यवसायीलाई व्यवसाय सञ्चालन गर्न कठिन हुने अवस्था आउने शाक्य बताउँछन ।
दुई मुलुकबीच तनाव रहुन्जेल सुनको मूल्यमा प्रभावित भइरहने देखिएको व्यवसायीको भनाइ छ । दुई मुलुकबीच बढेको गतिरोधको असर सेयर बजारमा परेसँगै अन्तर्राष्ट्रिय बजारमा सुन र पेट्रोलियम पदार्थको भाउ अझै बढ्ने अनुमान व्यवसायीको छ । यसअघि गत भदौ महिनामा मुल्य बढेर तोलमा ७३ हजार पुगेको छ । त्यसपछि लगाताबर घट्दै आएको सुनको मुल्य गत सातादेखि पुन उकालो लाग्ने आएको हो ।