सरकारले रेल बिधायक राष्ट्रियसभामा दर्ता गराएको छ, जसमा रेल्वेका कर्मचारी र यात्रुसँग झगडा गरे ६ महिना कैद र ५० हजार जरिवाना हुने प्रावधान रहेको छ ।

सरकारले पहिलोपटक ल्याएको रेल्वेसम्बन्धी विधेयकमा ‘कसैले रेल्वेका कर्मचारी वा यात्रुसँग झगडा गरे, रेलभित्र होहल्ला गरे वा गालीगलौज तथा अपमानजनक शब्द प्रयोग गरे ६ महिना कैद र ५० हजार जरिवानाको प्रावधान राखेको हो।

त्यस्तै, रेल्वेका कर्मचारीलाई काम गर्न रोक्ने, बाधा वा अवरोध गरेमा पनि सजाय पाउने छन्।

त्यस्तै, विधेयकमा रेल दुर्घटना हुन सक्ने गरी रेलको लिकमा ढुंगा, काठ फ्याँक्ने, रेल्वेका किला, काँटा झिक्ने र ज्वाइन्टहरू खुकुलो पार्ने काम गरे सात वर्षसम्म कैद र एक लाखसम्म जरिवानाको प्रावधान राखेको छ।

विधेयकले रेल्वेमा यात्रा गर्ने व्यक्ति सरुवा रोगबाट ग्रसित भएको पाइए यात्रा प्रतिबन्ध गर्न सक्ने प्रावधान गरेको छ।

साथै, रेल्वे बोर्डको अनुमतिमा सरुवा रोगबाट ग्रसितले यात्रा गर्न चाहे छुट्टै बस्ने ठाउँको व्यवस्था गर्नुपर्ने प्रावधान राखेको छ।

सरकारले ल्याएको विधेयकमा कसैले रेलको भाडा नतिरे त्यस्तो व्यक्तिलाई २५ हजारसम्म जरिवाना तिराउने प्रावधान समेत राखेको छ।

कसैले भाडा नतिरे भाडा र भाडा बराबरको थप रकमसँगै जरिवाना हुने प्रावधान विधेयकमा छ।