नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीले दैलेखमा एक गाउँपालिका अध्यक्षलाई अपहरण गरेको छ।

ठाटीकाँध गाउँपालिकाका अध्यक्ष तथा सत्तारूढ नेपाल कम्युनिष्ट पार्टीका दैलेख जिल्ला कमिटी सदस्य धीरबहादुर शाहीलाई  शनिबार राति विप्लव समूहले अपहरण गरेको हो।

शाहीसँगै उनकी श्रीमती तथा नेपाल राष्ट्रिय शिक्षक संगठनकी  केन्द्रीय उपाध्यक्ष  इला मल्ल शाहीलाई पनि विप्लव समूहले अपहरण गरेको छ।

दैलेखका सहायक प्रमुख जिल्ला अधिकारीले इन्द्रबहादुर क्षेत्रीले  प्रारम्भिक विवरणमा दुबै जना अपहरणमा परेको देखिएको सेतोपाटीलाई बताए। घटनाबारे प्रहरीले अनुसन्धान गरिरहेको छ,’ उनले भने।

कर्णाली प्रहरीका प्रमुख डिआइजी पूर्णचन्द्र जोशीले शाहीको खोजीका लागि प्रहरी परिचालन भइसकेको सेतोपाटीलाई बताए।

नेकपाका विदेश विभाग उपप्रमुख रहेका नेता विष्णु रिजालका अनुसार शाही दम्पत्तिलाई  हिजो राती ठाटीकॉध-२ को श्रीपाटामा रहेको आफ्नै घरबाट अपहरण गरेर बिजारेको जंगल हुँदै कालीकोटको भर्तांतिर लिएको जानकारी दिएका छन्। रिजाल दैलेख निवासी हुन्।

उनले फेसबुकमा लेखेका छन्- इला शाहीलाई बीच जंगलमा छाडिएको छ, धीरबहादुर शाहीलाई भुवानथानतिर लगिएको छ।

दैलेखमा डिएसपी हरि ओली, सुर्खेतमा डिआइजी पूर्णचन्द्र जोशी र काठमाडौंमा गृहसचिव प्रेम राईसँग समन्वय भइरहेको रिजालले बताएका छन्।

‘लेकमा हिउँ परेको छ, दैलेखको तिलेपाटा र कालीकोटतिरबाट पनि प्रहरी परिचालन भइसकेको छ,’ रिजालले लेखेका छन्, ‘विप्लवका कार्यकर्तालाई राजनीतिक व्यवहार गर्न र अपहरित शाही दम्पत्तिलाई अविलम्ब रिहा गर्न आग्रह गर्दछु।’

गत वर्ष  सरकारले प्रतिबन्ध लगाएको विप्लव समूहले जनप्रतिनिधिसँग तीव्र रूपमा चन्दा  असुली गरे पनि जनप्रतिनिधिलाई अपहरण नै गरेको यो पहिलो घटना हो।