काठमाडौं । राप्रपाले पृथ्वी जयन्तीलाई राष्ट्रिय दिवसको रुपमा मनाउने र यस दिन सार्वजनिक विदा दिन माग गरेको छ । केन्द्रीय कार्यालय धुम्बाराहीमा शुक्रबार केन्द्रीय पदाधिकारी र कार्य सम्पादन समितिको बैठकले पुस पौष २७ गते राष्ट्रिय एकता दिवस र पृथ्वी जयन्तीलाई पार्टीले सदा झैं राष्ट्रिय उत्सवको रुपमा मनाउने निर्णय गरेको सो पार्टीका प्रचार विभाग प्रमुख मोहन श्रेष्ठले जानकारी दिए ।

पुस २७ गते राष्ट्रिय एकता दिवस र पृथ्वी जयन्तीका दिन सार्वजनिक विदा दिन माग गरेको सो बैठकका निर्णय सार्वजनिक गर्न प्रचार विभाग प्रमुख मोहन श्रेष्ठले जारी गरिएको विज्ञप्तिमा भनिएको छ, ‘पौष २७ गते राष्ट्रिय एकता दिवस र पृथ्वी जयन्तीलाई पार्टीले सदा झैं राष्ट्रिय उत्सवको रुपमा मनाउनेछ, राष्ट्र निर्माताको सम्मानमा पृथ्वी जयन्तीलाई राष्ट्रिय पर्वको रुपमा मनाउन, सार्वजनिक बिदा दिन नेपाल सरकारसंग राप्रपा जोडदार माग गर्दछ । राप्रपाले यस विषयमा प्रधानमन्त्रीलाई ज्ञापनपत्र दिने र संसदमा पनि आवाज उठाउने भएको छ । राप्रपाले पौष २७ गते केन्द्रीय, प्रादेशिक र स्थानीय तहमा भव्य रुपमा मनाउने भएको छ । केन्द्रीय रुपमा मनाउन पार्टीका वरिष्ठ उपाध्यक्ष बुद्धिमान तामाङको संयोजकत्वमा समिति गठन गरिएको छ ।’

प्रचार विभाग प्रमुख श्रेष्ठले जारी गरेको विज्ञप्ति :

मिति : २०७६ पौष ४ गते
राप्रपाको केन्द्रीय पदाधिकारी र कार्य सम्पादन समितिको बैठक आज केन्द्रीय कार्यालय धुम्बाराहीमा बसेको छ । बैठकले :

१. हालै सम्पन्न प्रतिनिधि सभा, प्रदेश सभा र स्थानीय तहको उप निर्वाचनको समीक्षा, संगठन सुदृढीकरण लगायतका विषयमा घनीभूत छलफल गरेको छ । निर्वाचनमा पार्टीको पराजय र कमीकमजोरीको गम्भीर ढंगबाट समिक्षा गर्ने क्रममा पार्टीको कमजोर सांगठनिक संरचना नै पराजयको मुख्य कारक रहेको ठहर गरेको छ । बैठकमा उठेका विविध सुझावलाई संश्लेषण गरि निकट भविष्य बस्ने पार्टीको केन्द्रीय कार्य समितिको बैठकमा पेश गरिने र सो बैठकबाट पार्टीको आगामी कार्यनीति र कार्य्दिशा तय गरिनेछ ।

२. पौष २७ गते राष्ट्रिय एकता दिवस र पृथ्वी जयन्तीलाई पार्टीले सदा झैं राष्ट्रिय उत्सवको रुपमा मनाउनेछ, राष्ट्र निर्माताको सम्मानमा पृथ्वी जयन्तीलाई राष्ट्रिय पर्वको रुपमा मनाउन, सार्वजनिक बिदा दिन नेपाल सरकारसंग राप्रपा जोडदार माग गर्दछ । राप्रपाले यस विषयमा प्रधानमन्त्रीलाई ज्ञापनपत्र दिने र संसदमा पनि आवाज उठाउने भएको छ

राप्रपाले पौष २७ गते केन्द्रीय, प्रादेशिक र स्थानीय तहमा भव्य रुपमा मनाउने भएको छ । केन्द्रीय रुपमा मनाउन पार्टीका वरिष्ठ उपाध्यक्ष बुद्धिमान तामाङको संयोजकत्वमा समिति गठन गरिएको छ ।

३ समान विचार भएका व्यक्ति, समूह र दलसंग एकीकृत शक्ति निर्माण गर्न आव्हान गर्दै पशुपतिशमशेर राणा र डा.प्रकाश चन्द्र लोहनी नेतृत्वको राप्रपा (संयुक्त)लाई एकताको लागि आव्हान गर्दछ ।

४. विकास र सहयोग सम्बन्धि अमेरिकी निकाय मिलेनियम च्यालेन्ज कर्पोरेसन (एमसिसी) संगको अनुदान सहायता सम्झौता प्रस्ताव तत्काल संसदबाट पारित गरिनुपर्छ । नेपालले लाभ लिन सक्ने सम्झौता पारित गर्न ढिलाइ गरिनु आश्चर्यजनक रुपमा रहेको छ, यो सम्झौतालाई चालू संसद अधिवेशनमै अघि बढाउन राप्रपा सरकारसंग माग गर्दछ ।

मोहन श्रेष्ठ
प्रचार विभाग प्रमुख, राप्रपा ।