काठमाडौं , २४ मंसिर :-  १३ औं दक्षिण एसियाली खेलकुद सागको अन्तिम दिनको खेलमा नेपालले बक्सिङमार्फत आफ्नो पदक खातामा एक स्वर्ण र दुई रजत पदक थप्न सफल भएको छ ।

मंगलबार लगनखेलस्थित नेपाली सेनाको शारीरिक तालिम तथा खेलकुद केन्द्रमा भएको खेलमा नेपालका मुक्केबाज सनिल साहीले स्वर्ण पदक जित्न सफल हुँदा महिलातर्फ माला राई भने रजत पदकमा सीमित भइन् ।

पुरुषहरुको ६० केजी तौल समूहको फाइनलमा सनिल साहीले भारतले भिरेन्दर सिंहलाई पराजित गर्न सफल भएका हुन् ।

यो जितसहित नपाले १३ औं सागको स्वर्णमा अधशतकीय सफलता छुन सफल भएको छ । नेपालका लागि साहीको स्वर्ण ५० औं स्वर्ण हो ।

यता बक्सिङमा नै महिलातर्फको स्पर्धामा नेपालकी माला राई भारतकी पिंकी रानीसंग पराजित हुँदा रजत पदकमा सीमित भएकी छिन् । उनी पाँच शुन्यको फराकिलो अन्तमा पिंकीसंग पराजित हुन पुगेकी थिइन् ।

यस्तै महिलाको ६४ केजी तर्फ लाइटवइटमा पनि नेपालकी पुनम रावलले रजत पदकमा नै चित्त बुझाएकी छिन् । उनी भारतीय खेलाडी मञ्जु बम्बोरियासँग पराजित भएकी थिइन ।