काठमाडौं : विभत्स रूपमा आफ्नै पसलमा हत्या गरिएकी निरा पाण्डेको हत्या प्रकृतिले प्रारम्भमा गहिरो दुश्मनीको आशंका गरेको प्रहरीले आरोपी पक्राउपछि कारण लुटपाटको दाबी गरेको छ।

आरोपी विनोद विकलाई सार्वजनिक गर्दै केन्द्रीय अनुसन्धान ब्यूरोका एसएसपी दिनेश आचार्यले सिक्री लुट्न खोज्दा पाण्डेले प्रतिकार गर्दै हल्ला गर्न खोजेपछि छुरीले हानेको देखिएको बताए।

दिउँसै भएको हत्या घटनामा पाण्डेको करिब एक तोलाको सिक्री अनि पसलको काउन्टरमा रहेको १०-१२ हजार लुटेको दाबी गरे।

शरीरभरी अन्धाधुन्ध छुरी हानेर निर्मम तरिकाले भएको हत्यामा आरोपी र मृतकबीच पहिला सम्पर्क नदेखिएको, चिनजान समेत नभएको प्रहरीको दाबी छ।

विक कपन क्षेत्रबारे जानकार रहेको र उनी चाबहिलको एक रेष्टुरेन्टमा बाउन्सरको काम गरेको प्रहरी बताउँछ।

हत्याको प्रकृति अनि कारणबीच त्यति मेल भएको देखिन्न। प्रहरी समेत पूर्ण विस्वस्त देखिएन। अहिलेको घटनाको विवरण प्रारम्भिक र आरोपीको दाबीमा निर्भर देखियो।

एसएसपी आचार्यले अहिले घटनाको अनुसन्धान प्रारम्भिक चरणमा रहेको र विस्तृत अनुसन्धानपछि अन्य कारण पनि खुल्न सकिने बताए। 

‘थप अनुसन्धान भएर नयाँ चिज पनि आउनसक्छ,’ एसएसपी आचार्यले भने, ‘अहिले प्रारम्भिक अनुसन्धानमा सिक्री लुटपाट गर्ने उद्देश्यले नै हत्या भएको देखिन्छ।’

विकले आर्थिक समस्याका कारण वैशाख ७ मा लुट्न पसलमा उनको हत्या भएको पत्रकार सम्मेलनमा प्रहरीले दोहोर्याइरह्यो।

उनको पेट, छाती र घाँटीमा धेरैपटक धारिलो वस्तु प्रहार भएको थियो भने हातमा टोकिएको थियो।

सिक्री लुट्न खोज्दा प्रतिकारकै क्रममा हातमा टोकेको अनि घटनामा संलग्नताबारे विकले स्वीकारिसकेको प्रहरी दाबी छ। 

ब्यूरो प्रमुख एआईजी किरण बज्राचार्यले विकलाई शनिबार बेलुका १० बजे पक्राउ गरेर काठमाडौं ल्याएको र अहिले अनुसन्धान प्रारम्भिक चरणमै रहेको बताइन्।

विकले लुटेको सुन बिक्री गरेको स्थान, घटनाको दिन बोकेको झोला अनि रगत लागेको सर्ट फेला परेको प्रहरी दाबी छ। (उकेरा)