कोहलपुर/ जिल्ला ट्राफिक प्रहरी कार्यालयले गत फागुन महिना भन्दा चैत्र महिनामा २७,७८,५०० राजश्व संकलन गरेको छ । गत फागुन महिनाको भन्दा चैत्र महिना २७.४५ प्रतिशतले बृद्धि गरेको हो ।

विगत तीन आर्थिक बर्षको तथ्याङकलाई मध्यनजर गर्दा महिनामा ३ देखी ४ जनाको मृत्यु हुने गरेकोमा हाल ट्राफिक प्रहरी प्रमुख तिलक बहादुर सुनार आए सँगै शून्य प्रतिशतमा ल्याउन सकिएको बाँके ट्राफिक प्रहरीले जनाएको छ ।

यसै गरी बाँके ट्राफिकले जनचेतनामुलक कार्यक्रमलाई पनि तिव्रता दिएको छ । गत महिनामा ११५ वटा कार्यक्रम जिल्ला भरी गरिएको साथै मा.प.से कक्षा संचालन गरी २०३ जनालाई लाभान्वित गरिएको समेत ट्राफिक प्रहरी निरिक्षक तिलक बहादुर सुनारले बताएका छन् ।

बाँकेका विभिन्न स्थानमा चेकजाँचमा कडाई गरी कारवाही गर्दा चैत्र महिनामा दुर्घटनामा परी कोही कसैको मृत्यु नभएको समेत उल्लेख गरेका छन् । प्रहरी निरिक्षक सुनार भन्छन्‘हाम्रो व्यवहारमा पनि विनम्रता देखिनेछ भने कानून कार्यान्वयको सवालमा हामी कडाइका साथ प्रस्तुत हुनेछौं’, उनले थपे, ‘बाँके लाई आधुनिक, सहज र प्रभावकारी बनाउन ट्राफिक प्रहरीको कदम मात्र पर्याप्त हुँदैन । त्यसैले सबै सरोकारवाला निकायसँग पनि सहकार्य गरेर अघि बढ्नेछु ।’

ट्राफिक अनुशिक्षण र जनचेतनामा विशिष्टिकरण गरिने बताउँदै उनले भने, ‘ट्राफिक नियमको पालना गर्ने कुरालाई आम नागरिककै चाहनाको रुपमा लैजाने गरी काम गर्छौं ।’