रासस\बाँकेको खजुरा गाउँपालिकामा रहेको एक हजार ८०० मिटर नेपालगञ्ज–गुलरिया सडक ठेक्का लिएको पाँच वर्षसम्म पनि पूरा हुन सकेको छैन । २०७४ वैशाखमा गजुरमुखी निर्माण सेवा इलामले रू. २१ करोड ४९ लाखमा चार लेन सडक निर्माणको ठेक्का लिएको थियो ।

ठेकेदार कम्पनीले समयमै काम गर्न नसक्दा आफूहरूले दु:ख पाएको स्थानीयको गुनासो छ । सम्झौता अनुसार कम्पनीले इलाका प्रहरी कार्यालय धनौलीदेखि १ नम्बर बजारसम्मको चार लेन सडक निर्माण गर्नुपर्ने थियो । कम्पनीले सम्झौता भएको ३० महीनामा काम सक्ने लिखित प्रतिबद्धता गरेको थियो । तर, अझैसम्म पनि सडक अपूरो छ । विभिन्न बहानामा पटक–पटक म्याद थपिए पनि निर्माण पूरा हुन नसकेको स्थानीय सतिश निरौलाले बताए । सडक निर्माणको माग गर्दैै स्थानीयले पटक–पटक आन्दोलन गर्दै आएका छन् ।

सडक डिभिजन कार्यालय नेपालगञ्जका सूचना अधिकारी इञ्जिनीयर जनकबहादुर धामीले निर्माण ढिलाइ भए पनि ९० प्रतिशत काम पूरा भएको दाबी गरे । उनले यो वर्षसम्म पनि काम पूरा नभए ठेकेदार कम्पनीलाई कालोसूचीमा राखिने बताए ।

खजुरा गाउँपालिकाका अध्यक्ष डम्बर विकले सम्बन्धित निकायमा ताकेता गरे पनि काम हुन नसकेको बताए । सडक अलपत्र पार्ने ठेकेदारलाई लुम्बिनी प्रदेश सरकारका विनाविभागीय मन्त्री कृष्णा केसीले तत्काल निर्माण पूरा गर्न निर्देशन दिएकी छिन् ।