बाँके \नेपालगन्जस्थित जमुनाह नाकामा भारतबाट हुने अवैध तस्करी नियन्त्रणका लागि प्रहरीले अभियान चलाएको छ । भारतबाट तस्करीका लागि नेपालगन्ज प्रवेश गराइएको ७ ड्रम मसला, ३ रोल कपडा, ३० केजी माछा, ४० वटा बोइलर कुखुरा जमुनाह प्रहरीका वरिष्ठ सई पूर्ण विक नेतृत्वको टोलीले नियन्त्रणमा लिएको छ ।

साढे तीन लाख रुपैयाँ बराबरको अवैध सामग्री जिल्ला प्रहरी कार्यलय हुँदै भन्सार बुझाइएको छ । प्रहरीले एक हप्तासम्म अवैध रुपमा नाका हुँदै लैजाँदै गरेको पाँच लाख बराबरको सामग्री नाकाबाट बरामद गरेको छ ।

यस्तै प्रहरीले कपडा, खाद्यान्न, सुर्ती, कुखुरा, माछा । खाने मसला गरी एक लाख १२ हजारको सामग्री बरामद गरेको छ । जमुनाह नाकाको पूर्व जमुनाह गाउँबाट अवैध सामग्री बरामद भएको विकले बताए ।

‘नाका भन्ने बित्तिकै जमुनाह नाका मात्र बुझिन्छ,’ वरिष्ठ सई विकले भने, ‘भित्री नाकामा पनि तस्करहरुको चलखेल रोक्न सक्रिय छौं ।’

उपप्रधान तथा गृहमन्त्री रवि लामिछानेले अवैध तस्करी रोक्न देशैभरका सीडीओ तथा प्रहरी प्रमुखलाई निर्देशन दिएपछि बाँकेमा पनि कडाइ सुरु गर्न लागिएको हो । गृहको निर्देशनपछि नाकामा अवैध क्रियाकलाप नियन्त्रणका प्रयास भएका छन् । नाकामा सामान बोकेर आउने भरीयाहरु समेत नदेखिएको उनले बताए । साथै हाल बाँकेका भित्री सबै नाकाहरुमा सुरक्षा व्यवस्था कडा गरिएको बताइएको छ ।