बाँके\लुम्बिनी प्रदेशमा सत्तारुढ गठबन्धनले मुख्यमन्त्रीको लागि दाबी पेश गर्ने कार्यक्रम बुधबारका लागि सरेको छ ।सत्ता गठबन्धन दलहरूबीच आन्तरिक तयारी पूरा नभएपछि भोलिका लागि सारेको हो । एमाले प्रदेश अध्यक्ष राधाकृष्ण कँडेलले नेकपा माओवादीभित्रको आन्तरिक तयारी नपुग्दा बुधबारको लागि सारिएको बताए । 

गठबन्धनले एमाले संसदीय दलका नेता लीला गिरी मुख्यमन्त्रीको रुपमा अगाडि सार्दैछ । प्रदेश प्रमुख शेरचनले संविधानको दफा १६८ को उपदफा (२) बमोजिम दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रदेशसभा सदस्यलाई मुख्यमन्त्री नियुक्त गर्न बुधबार ५ बजेसम्मका लागि समय दिएका छन् । 

गिरीले एमालेका २९, माओवादी केन्द्रका १०, राप्रपाका ४ र नागरिक उन्मुक्ति ४, जनमत पार्टीका ३, जसपाका ३,  स्वतन्त्र २ सहित ५५ सांसदको हस्ताक्षर जुटाएर दावी पेश गर्ने तयारी छ । ८७ सदस्यीय प्रदेशसभामा बहुमतको लागि ४४ सांसद आवश्यक पर्छ ।प्रदेशमा कांग्रेसका २७, लोसपाका ३ र नेकपा एकीकृत समाजवादी र राष्ट्रिय जनमोर्चाका १–१ सांसद छन् ।