बाँके\ऊर्जा, जलश्रोत र सिँचाइमन्त्री पम्फा भुसालले हालकै गठबन्धनले नयाँ सरकार बनाउने कुरामा कुनै पनि दुबिधा नरहेको बताएका छन।

अहिलेको आवश्यकता नै नेपाली कांग्रेस, नेकपा माओवादी केन्द्र र नेकपा एकीकृत समाजवादीलगायतको गठबन्धनको सरकार निर्माण हुने सिँचाइमन्त्री पम्फा भुसालले बताइन।

राष्ट्रिय गौरवका आयोजनाको निरीक्षणका लागि बाँके पुग्नुभएकी मन्त्री भुसालले बिहीबार नेकपा माओवादी केन्द्र, नेपालगञ्ज नगर कमिटीले आयोजना गरेको भेटघाट कार्यक्रममा उक्त कुरा बताएकी हुन। भुसालले अहिले धेरैको मनमा कस्तो सरकार बन्ने र कसको नेतृत्वमा सरकार गठन हुने भन्ने प्रश्न र आशङ्काहरू रहेको जनाउँदै उहाँले सरकार गठबन्धनकै बन्ने गरी जनताले जनादेश दिएकाले सोही बमोजिमको सरकार बन्ने छ उनले भनिन ।

कांग्रेस र माओवादीले आलोपालो सरकार चलाउने सहमति रहेको जनाउँदै पहिले कुन दलको नेतृत्वमा गठन गर्ने भन्ने कुरा गठबन्धनमा रहेका दलहरूले संसदीय दलको नेता चुनिसकेपछि मात्रै तय हुने मन्त्री भुसालले कार्यक्रममा जानकारी गराइन। नेकपा माओवादी केन्द्रकी उपमहासचिव समेत रहेकी मन्त्री भुसालले माओवादी भित्र पनि पराजयको समीक्षा सुरु भैसकेको जनाउँदै अब सबै मिलेर पार्टीलाई नयाँ तरिकाले माथि उकास्ने काममा लाग्नु पर्नेमा जोड दिएकी छन।

अबदेखि माओवादीमा टिके प्रथाको अन्त गरेर तलदेखि माथिसम्म हरेक निकायमा निर्वाचन गराइने र निर्वाचित हुनेले मात्र स्थान पाउने मन्त्री भुसालले उल्लेख समेत गरिन।

भेटघाट कार्यक्रममा पार्टीका सबै कार्यकर्ताको प्रतिनिधित्व गर्दै स्थानीय नेताहरू वसन्त लामिछाने, टङ्क धामी, मन्दिरा पाण्डे, नन्दकिशोर कश्यप र शरिफ बागवानले नेत्री भुसालसँग निर्माचनको परिणाम र पार्टीको अवस्थालगायतका विषयमा विभिन्न जिज्ञासा राखेका थिए ।