काठमाडौँ\इलाम क्षेत्र नम्बर १ मा नेकपा एकीकृत समाजवादी पार्टीका सम्मानित नेता झलनाथ खनाल पराजित भएका छन्। खनाल नेकपा एमालेका उम्मेदवार महेश बस्नेतसँग २९ सय ५७ मतले पराजित भएका हुन्।

निर्वाचन अधिकृतको कार्यालयले अन्तिम मतपरिणामको विवरण सार्वजनिक भने गरिसकेको छैन। सुरुदेखि नै पछि परिरहेका खनालले हार्ने देखेपछि पुनः गणना गर्नुपर्ने माग गरेका थिए। तर निर्वाचन आयोगले त्यसलाई स्वीकार गरेन।

खनालले सुरुमा ५ सय मत तलमाथि गरिएको बताएका थिए। त्यसपछि पनि उनले २६० मतमा गडबड गरिएकाले मतगणना बहिष्कार गर्ने चेतावनी दिएका थिए। आयोगले उनको दाबीलाई अस्वीकार गर्दै मतगणना टुंग्याएको हो। इलाम-२ मा एमालेका सुवास नेम्वाङ झिनो मतान्तरले निर्वाचित भएका छन्।