कोहलपुर नगरपालिका वडा नम्बर १४ स्थित पार्वतीपुरमा मंगलबार एक दम्पत्तिको ‘हत्या’ घटनाको रहस्य उजागर भएको छ । घरायसी विवादका कारण प्रतिशोध लिन आफ्नै सहोदर दाजुको योजनामा २५ वर्षीय भाई कृष्णकुमार गडरिया र २३ बर्षिय भाई बुहारी अञ्जली गडरीयाको हत्या गराइएकोे रहस्य खुलेको हो । इलाका प्रहरी कार्यालय कोहलपुरमा मंगलबार अपरान्ह पत्रकार सम्मेलन गरेर प्रहरीले कृष्णका दाई विजय र भाउजु रेखाले भारतबाट दुई जना कन्ट्र्याक किलरलाई बोलाएर हत्या गराएको जानकारी दिएको छ ।

के कारणले आफ्नै सहोदर दाजुले भाई–बुहारीको हत्याको योजना बनाए ?
करिब एक महिनादेखि गडरिया परिवारमा घरायसी विवाद चलिरहेको थियो । एकाएक घरयसी विवाद झैझगडा र कुटपिटसम्म पुग्यो । घरायसी विवादको चरम उत्कर्ष भने भाई कृष्णले बुवासँग मिलेर दाजु बिजयलाई कुटपिट गरेपछिको घटनासम्म पुग्यो । वुहारी अञ्जलीकै कारण भाईले आपूmलाई कुटपिट गरेको निष्कर्ष बिजयले निकालेसँगै वुहारीको हत्या योजनासम्म बिजय पुगे । १८ दिन अघि कुटपिट भएपछि त्यसको बदला लिन बिजयले भारतीय दुई जना कन्ट्राक किलरलाई ५०/५० हजारको सुपाडी दिए । सोमबार राती ११ देखि १२ बजेको बीचमा कृष्ण र अञ्जलीको हत्या भएको बाँकेका प्रमुख श्यामकृष्ण अधिकारी बताउँछन् ।
गडरिया दम्पतीको हत्या हुँदा माथिल्लो तलामा दाजु भाउजु विजय र रेखा रहेको भनिए पनि हत्या हुँदा विजय तल नै रहेको प्रहरीको भनाई छ । प्रहरीका अनुसार मृतक दम्पत्ति घरको कोठामा र उनका दाइ र भाउजु छतमा सुतेका थिए । मंगलबार बिहान अबेला सम्म पनि उनीहरु नउठेपछि आफन्तले प्रहरीलाई खबर गरेका थिए । उनीहरुबीच एक वर्षअघि मात्र विवाह भएको थियो । मृतकको शब भेटिएपछि प्रहरीले अनुसन्धान गर्दै जाँदा शंकास्पद अवस्थामा बसेका सहोदर दाई विजयलाई नियन्त्रण लिई सोधपुछ गरेको थियो । विजयले प्रहरीलाई विगत केही महिना अगाडि अञ्जलीले श्रीमान र ससुरालाई घरायसी विषयमा उक्साएर आफूलाई कुटपिट गर्न लगाएका कारण सुपारी रकम दिएर बुहारीलाई मार्न लगाएको बयान दिएका छन् । अञ्जलीलाई मात्र मार्न भनी सुपारी दिएपनि भाईको पनि हत्या भएको उनले स्विकारेको प्रहरीले जनाएको छ ।