प्रदिप आचार्य
कोहलपुर क्षेत्र देहव्यापारको हब बन्दै गइरहेको पाइएको छ । यस विषयमा व्यापक जनगुनासो बढेपनि कोहलपुर प्रहरी यो विषयमा मौन रहनुले केही समययता कोहलपुर क्षेत्रमा देहव्यापारको घटनाले प्रश्रय पाइरहेको हो । विशेष गरी कोहलपुरमा यौन प्यास मेट्न आउने आगन्तुकहरुको संख्या बढ्नुले पनि देहव्यापारको श्रृंखला बढ्दै गइरहेको पुष्टि भएको छ । अझ अचम्म मान्नुपर्ने कुरा के भने यौनकर्मी महिला र ग्राहकहरुबीच बार्गेनिङ्ग हुने स्थान नै न्यूरोड क्षेत्र रहेको छ । जुन क्षेत्र इलाका प्रहरी कार्यालय कोहलपुर देखि मुस्किलले सय/दुई सय मिटरको दुरीमा पर्ने गर्छ ।

कोहलपुर न्यूरोड चोकमा आइतवार राती ९ बजेपछि सुर्खेतबाट नेपालगञ्ज फर्कदै गरेका मोटरसाइकल सवार युवाहरु रोकिन्छन् र सडक किनार रेलिङ्गमा उभिरहेका युवतीसँग संवाद शुरु गर्छन् । न्यूज नमस्ते अनलाइन न्यूज पोर्टलका प्रतिनिधी अलि परबाट यी सब गतिविधी नियालिरहेका हुन्छन्, अलि नजिक गएर कुरा बुझ्दा युवतीहरुले मोटरसाइकल सवार युवाहरुलाई यहाँको होटलमा वास बस्ने वातावरण मिलाइदिने र सहवास गर्न इच्छुक भएमा त्यो पनि सेवा आफूहरुबाटै व्यवस्थापन गर्न सकिने भनेपछि अन्ततः दुईवटा मोटरसाइकलमा सवार युवाहरु एक/एक युवतीलाई मोटसाइकलको पछाडी राखेर बसपार्कतिर हुइकिन्छन् ।

न्यूरोड क्षेत्र भित्र नजिकको एक सामान्य खाजा पसलमा खाजा खान पुगेका हाम्रा सहकर्मीले खाजा के छ भनेर प्रश्न गर्दा खाजा पसल सञ्चालक जवाफ दिन्छन्, खाजामा भेज तथा मासु परिकार र मासुमा पनि काँचो मासु पनि पाइन्छ भनेर जवाफ दिन्छन् ।

हवल्दारपुर क्षेत्र नजिक वाहिर सामान्य देखिने एक रेष्टुरेन्टमा राती १० बजेपछि चहलपहल बढि हुन्छ । मदिरा सहित यौनकर्मी महिलासँग यौनको प्यास मेट्न जाने पुरुषहरुको बाक्लो उपस्थिती हुँदै आएको बारेमा प्रहरी जानकार छ तर कहिल्यै प्रहरीको चेकजाँच तथा अनुगमन यो ठाउँमा हुँदैन । केहि समयअघि कोहलपुर बसपार्क पछाडीको सडकमा दिउँसै नग्न अवस्थामा यौनकर्मी महिलाले पैसामा कुरा नमिलेपछि पुरुष ग्राहकलाई लखेट्दै गरेको घटनाले सञ्चार माध्यमहरुमा राम्रै स्थान पायो । यि घटना देहब्यापारको प्रतिनिधी घटना मात्र हुन् । यस्ता घटना तथा गतिविधीहरु लामो समयदेखि निर्वाध रुपमा भइरहेका निरन्तर घटनाक्रम हुन् ।

कोहलपुर क्षेत्र अन्र्तगत न्यूरोड, दशविगाह, बसपार्क क्षेत्र, हाइस्कूल, हवल्दारपुर लगाएतका क्षेत्रमा सञ्चालित होटल तथा रेष्टुरेन्टहरुमा निर्वाध रुपमा देहव्यापारसँग सम्बन्धित गतिविधीहरु बढ्दै जाँदा नियामक तथा सरोकारवाला निकाय एवम् कोहलपुर प्रहरी यस विषयमा खुलेर एक्सनमा नजानुले देहव्यापार गतिविधी सञ्चालन भइरहेका होटल, रेष्टुरेन्ट तथा यौनकर्मीहरुबाट मासिक रुपमा मोटो रकम प्रहरीलाई पुग्ने श्रोतको दावी छ ।

कोहलपुरमा प्रहरीको भूमिकाबारे व्यापक आलोचना बढ्दैगएपछि केही दिन पहिले दश विगाह क्षेत्रका होटलहरुमा प्रहरीले छापा हानेको थियो, प्रहरी आफ्नो आलोचनाबाट बच्न सम्बन्धित होटल तथा रेष्टुरेन्टहरुमा छापा मार्न थालेको सम्बन्धित होटल, रेष्टुरेन्ट एवम् यौनकर्मी महिला तथा देहव्यापारमा संलग्न व्यक्तिहरुलाई प्रहरीबाटै पूर्व जानकारी हुने गरेको होटल श्रोतले दावी गरेको छ ।