एमाले अध्यक्ष केपी शर्मा ओलीको गृह जिल्ला झापाको १५ मध्ये पाँच स्थानीय तहमा मात्रै एमालेले अग्रता लिएको छ । 

७ स्थानीय तहमा कांग्रेसले अग्रता कायम गरेको छ भने दुईमा राष्ट्रिय प्रजातन्त्र पार्टीले जित्ने सम्भावना देखिएको छ । 

एमालेले अग्रता कायम गरेको अर्जुनधारा, गौरादह, विर्तामोड, मेचीनगर र शिवसताशी नगरपालिकामा कांग्रेस र माओवादी केन्द्रले चुनावी तालमेल गरेर प्रमुख कांग्रेसलाई र उपप्रमुख माओवादी केन्द्रलाई दिएका छन् ।

कन्काई नगरपालिकामा भने स्वतन्त्र उम्मेदवारले एमालेका उम्मेदवारलाई पछि पारेका छन् । ओलीको गृहनगर दमक नगरपालिकामै एमाले पछि परेको छ । दमकमा राष्ट्रिय प्रजातन्त्र पार्टीले अग्रता कायम गरेको छ । 

राप्रपाका उम्मेदवार रामकुमार थापाले एमालेकी उम्मेदवार गीताकुमारी पौडेल अधिकारीलाई पछि पारेका हुन् । 

आइतवार दिउँसो १२ बजेसम्म थापाले दुई हजार १८५ मत ल्याएका छन् भने एमाले उम्मेदवार अधिकारीले दुई हजार १३६ मत मात्रै पाएकी छन् । 

उपप्रमुखमा भने नेपाली कांग्रेसको रेगिना भट्टराई अगाडि छिन् । उनले दुई हजार १३८ मत पाएकी छन् । 

एमालेले उपप्रमुखको उम्मेदवार बनाएको अम्बिकाप्रसाद खनालले एक हजार ९७७ मत मात्रै पाएका छन् । 

त्यसैगरी, झापाको भद्रपुर नगरपालिकामा पनि कांग्रेसले अग्रता कायम गरेको छ । भद्रपुरमा पाँच दलीय गठबन्धनले एमालेविरुद्ध चुनावी तालेमल गरेका थिए । 

भद्रपुरमा कांग्रेसले प्रमुख र माओवादी केन्द्रले उपप्रमुख लिएर चुनावी प्रतिस्पर्धामा सहभागी भएका थिए । कांग्रेसका उम्मेदवार गणेश पोखरेल दुई हजार १६ मतसहित अग्रता लिइरहेका छन् भने एमालेका असारु राजवंशीले एक हजार ५५९ मतसहित दोस्रो स्थानमा छन् । 

दमकमा राप्रपाका नवराज पनेरुले एक हजार ४०५ मत ल्याएर तेस्रो स्थानमा छन् । 

दमकमा उप्रप्रमुखमा गठबन्धनका तर्फबाट उपप्रमुखमा माओवादी केन्द्रका उम्मेदवार शिवकुमार राजभण्डारीले अग्रता कायम गरेका छन् । उनले अहिलेसम्म एक हजार ८९७ मत पाएका छन् । उनलाई एमालेकी कौशल्या अधिकारीले पछ्याइरहेकी छन् । अधिकारीले एक हजार ४९१ मत मात्रै पाएकी छन् । तेस्रो स्थानमा भने राप्रपाकी राधा कार्की छिन् । उनले एक हजार ४४५ मत पाएकी छन् । 

झापाको विर्तामोड नगरपालिकामा भने एमालेले अग्रता कायम गरेको छ । एमालेकी उम्मेदवार पवित्रादेवी महताराले ७०० मतसहित अग्रता कायम गरेकी हुन् ।

विर्तामोडमा कांग्रेसले उम्मेदवार बनाएको भोजराज सिटौलाले अहिलेसम्म ४७७ मत ल्याएका छन् । विर्तामोडमा राप्रपा भने तेस्रो स्थानमा छ । राप्रपाका ध्रुवकुमार उप्रेतीले १३३ मत मात्रै पाएका छन् ।

विर्तामोड नगरपालिकाको उपप्रमुखमा पनि एमाले नै अगाडि छ । एमालेका नगेन्द्रप्रसाद संग्रौलाले ६८९ मत पाएका छन् भने माओवादी केन्द्रका चन्द्रप्रसाद कडरियाले संग्रौलालाई पछ्याइरहेका छन् । कडरियाले २९४ मत पाएका छन् । 

विर्तामोडमा कांग्रेस र माओवादीले एमालेविरुद्ध चुनावी तालमेल गरेको थियो ।

अर्जुनधारा नगरपालिकामा एमाले अग्रता कायम गरेका छन् । 

कचनकवल गाउँपालिकामा भने रापप्रपाविरुद्ध कांग्रेस र एमालेले गठबन्धन गरेका छन् । कचनकवलमा कांग्रेसले गाउँपालिका प्रमुख पाएको छ । मतगणनामा कांग्रेसका उम्मेदवारले अग्रता कायम गरेका छन् । 

कन्काई नगरपालिकामा स्वतन्त्र उम्मेदवार शेरबहादुर थापाले अग्रता कायम गरेका छन् । कन्काईमा एमाले दोस्रो र कांग्रेस तेस्रो स्थानमा छन् । 

कमल गाउँपालिकामा पनि कांग्रेसले अग्रता लिएको छ । त्यहाँ एमालेका उम्मेदवार एक हजार मतले पछि परेका छन् । कांग्रेसका हुकुमसिंह राईले दुई ६५९ मत पाउँदा एमालेका भीमप्रसाद राईले एक हजार ६४५ मत मात्रै पाएका छन् । 

गौरादह नगरपालिकामा भने एमालेका प्रमुख र उपप्रमुखले नै अग्रता कायम गरेका छन् । त्यहाँ कांग्रेसका उम्मेदवारले एमालेलाई पछ्याइरहेका छन् । गौरादहमा कांग्रेस र माओवादीले तालमेल गरेका थिए । 

गौरीगञ्ज गाउँपालिकामा कांग्रेसका उम्मेदवार फुलवति राजवंशीले अग्रता कायम गरेकी छन् । उपाध्यक्षमा भने एमालेकी पुजन न्यौपाने कुँवरले अग्रता लिएकी छन् । 

झापाकै बाह्रदशी गाउँपालिकामा पनि कांग्रेसले अग्रता लिएको छ । कांग्रेसका खड्गप्रसाद राजवंशीले एक हजार ७५९ मत पाउँदा एमालेका देवीप्रसाद चौलागाईले एक हजार ५८८ मत मात्रै पाएका छन् । 

बुद्धशान्ति गाउँपालिकामा कांग्रेसका मनोज प्रसाईंले ५६६ मत पाउँदा एमालेका मीरा भूर्तेलले ५५० मत मात्रै पाएकी छन् । 

शिवसताशी नगरपालिकामा भने एमालेका मेगाहाङ्ग थोप्राले अग्रता कायम गरेका छन् । उनले एक हजार २६४ मत पाउँदा कांग्रेसका पर्शुराम ढुंगानाले एक हजार १९ मत मात्रै पाएका छन् ।

हल्दीबारी गाउँपालिकामा भने राष्ट्रिय प्रजातन्त्र पार्टीले एमालेलाई पछि पारेको छ । 

राप्रपाका रविन्द्रप्रसाद लिङ्देनले एक हजार ८६५ मत पाउँदा एमालेका डम्बरबहादुर गिरीले एक हजार ११८ मत मात्रै पाएका छन् । 

उपाध्यक्षमा पनि राप्रपाले नै लिड गरेको छ । राप्रपाको लक्ष्मीदेवी मैनालीले एक हजार ५३८ मत पाउँदा एमालेको शान्तादेवी गौतमले एक हजार १०९ मत मात्रै पाएकी छन् ।