मेयरमा लक्ष्मी कुमारी हमाल र उपमेयरमा कपिल शाह

कोहलपुर/ आइतबार बसेको राप्रपा नेपालको नगर कार्यसमिति बैठक कोहलपुरले नगरपालिकाको मेयर र उपमेयर पदको उम्मेदवार टुंगो लगाएको छ । कोहलपुर नगरको मेयरमा लक्ष्मी कुमारी हमाल र उपमेयरमा युवा नेता कपिल शाहलाई उम्मेदवार बनाउने निर्णय भएको छ ।

बैठकले कोहलपुर नगरपालिका १५ वटै वडामा अध्यक्ष तथा सदस्यहरु चुनाव चिन्ह तिर लिएर चुनावमा सहभागी रहने निर्णय गरेको छ । राप्रपा नेपालले भोली १२ गते सम्पूर्ण उम्मेदवार सहित निर्वाचन कार्यालय जाने निर्णय समेत गरेको छ ।

राप्रपा नेपाल पुर्नजागृत भएको झण्डै २ महिनामा कोहलपुर नगरपालिका भित्र सबै वडाहरुमा आफ्ना उम्मेदवारहरुलाई अगाडि सारेको छ । पुर्नजागृत राप्रपा नेपालले आफ्ना सम्पूर्ण उम्मेदवारहरुलाई हारजित जे भए पछि आफ्नो पार्टीले स्थानिय तहको निर्वाचनमा प्रतिनिधित्व मूलक भाग लिने भएको राप्रपा नेपालका एक नेताले बताएका छन् ।

राप्रपा नेपाल र नेकपा एमाले बीच चुनावी तालमेल बारे राप्रपा नेपालको केन्द्रिय सचिवलाय र नेकपा एमालेको केन्द्रिय सचिवालयले यस अघि आ–आफ्ना पार्टीको जिल्ला तहका समितिहरुमा पत्राचार गरिसकेको भएता पनि बाँकेमा चुनावी तालमेल नभएको राप्रपा नेपाल स्रोतले बताएको छ ।

को हुन् लक्ष्मी कुमारी हमाल ?
राप्रपा नेपालको केन्द्रिय सदस्य एवं राप्रपा नेपालको महिला संगठनको केन्द्रिय सदस्य रहेकी लक्ष्मी कुमारी हमाल कोहलपुर नगरपालिका वडा नं २ बाट सक्रिय राजनीतिमा होमिएकी एक समाजसेवी, महिला हक अधिकार निम्ति सक्रिय भूमिका निर्वाह गर्दै आइरहेकी छिन् । हमालको कार्यशैली प्रति विश्वस्त हुँदै राप्रपा नेपालले उनलाई कोहलपुर नगरको मेयर पदको लागि टिकट दिएको छ ।

यस अघि लक्ष्मी कुमारी हमाल नेपाली कांग्रेसको कालिकोटबाट पूर्व महाधिवेशन प्रतिनिधि, महिला संगठनको जिल्ला अध्यक्ष समेत रहेकी हमालले राप्रपा नेपालको नीति नेतृत्वले मात्र देशलाई अग्रणी स्थानमा पु¥याउने सक्ने भन्दै राप्रपा नेपालको सक्रिया राजनीतिमा होमिएकी हुन् ।

को हुन् कपिल शाह ?
राप्रपा नेपालको स्थापना कालदेखी कोहलपुर नगरपालिकामा महत्वपूर्ण भूमिका रहेको थियो । उनी विस्तारै राप्रपा नेपालको विद्यार्थी संगठनको केन्द्रिय सदस्य, युवक संगठनको केन्द्रिय सदस्य तथा गत स्थानिय तहको कोहलपुर नगरपालिका वडा नं ११ को वडा सदस्य पदमा निर्वाचनमा होमिएका थिए ।

युवाहरु माझ निकै नै लोकप्रिय, सहयोगीका रुपमा परिचित कपिल शाह राप्रपा महाधिवेशन पश्चात उनी राष्ट्रिय प्रजातन्त्र पार्टीमै सक्रिय थिए । राप्रपा नेपालको नीति निष्ठा र सिद्धान्तमा रही कमल थापा नेतृत्वको राप्रपा नेपालमा पुनः यात्रा शुरु गर्दै बैशाख ३० गते हुने स्थानिय तहको निर्वाचनमा कोहलपुर नगरका उपमेयर पदको टिकट लिई निर्वाचनमा होमिने भएका हुन् ।