बालुवाटारमा सत्तारूढ गठबन्धनले बनाएको चुनावी तयारी तथा अनुगमन समितिको बैठक बसेको छ।

आज दिउँसो नेपाली कांग्रेसका वरिष्ठ नेता रामचन्द्र पौडेलको नेतृत्वमा रहेको समितिको बैठक बसेको हो।

बैठकमा सहभागी सरकारका प्रवक्ता ज्ञानेन्द्रबहादुर कार्कीले कुन स्थानीय तहमा कुन दलले उम्मेदवारी दिने भन्नेजस्ता विषयमा छलफल भइरहेको बताए।

‘एक, दुई दिनमा हामी कुन स्थानीय तहमा कुन दलले उम्मेदवारी दिने भन्ने निर्णयमा पुग्छौं,’ उनले पत्रकारहरूसँग भने।

आज बिहान सत्तारूढ गठबन्धनका शीर्ष नेताहरू पनि चुनाव केन्द्रित छलफलमा जुटेका थिए। महानगर र उपमहानगरमा सोमबारसम्म भागबन्डा गरिसक्ने सहमति उनीहरूबीच भएको थियो।

छ महानगर र ११ उपमहानगरमा कहाँ कुन दलले उम्मेदवारी दिने भन्ने टुंगोमा गठबन्धनका नेताहरू पुग्न सकेका छैनन्। वैशाख ११ र १२ मा उम्मेदवारको मनोनयन दर्ता गर्ने तालिका छ।