कोहलपुर क्षेत्रको शान्ति सुरक्षा तथा ट्राफिक व्यवस्था मजबुद बनाउन कोहलपुर प्रहरी प्रमुख एवम् जिल्ला ट्राफिक प्रमुखले प्रतिबद्वता जनाएका छन् । कोहलपुर उद्योग वाणिज्य संघले विहिवार संघको कार्यालयमा आयोजना गरेको अन्तरक्रिया कार्यक्रममा संघका पदाधिकारीहरुमाझ कोहलपुर प्रहरी प्रमुख प्रहरी उपरीक्षक ऐन बहादुर मल्ल र बाँके ट्राफिक प्रमुख हिमाल शाहले आफ्नो कार्यकाल अवधीभर शान्ति सुरक्षा र ट्राफिक व्यवस्थापनमा संवेदनशील बन्दै शान्ति अमन चयनमा अहोरात्र खटिने प्रतिवद्वता समेत व्यक्त गरेका छन् ।

कोहलपुर उद्योग वासणज्य संघका पूर्व अध्यक्षहरु कर्ण बहादुर थापा, नरेन्द्र प्रसाद शर्मा, राजेन्द्र श्रेष्ठ लगाएतका पूर्व एवम् वर्तमान पदाधिकारीहरुले कोहलपुर क्षेत्र शान्ति सुरक्षाको दृष्टिकोणमा अति संवेदनशील क्षेत्र रहेको बताउँदै नगर क्षेत्रको वस्तुस्थितीबारे जानकारी गराएका थिए । वाणिज्य संघका अध्यक्ष लक्ष्मण राज पौडेलले व्यवसायिक सुरक्षामा देखिएका चुनौती र व्यवसायीहरुका साझा समस्याबारे कोहलपुर प्रहरी प्रमुख एवम् बाँके ट्राफिक प्रमुखलाई जानकारी गराउँदै आगामी दिनमा आवश्यक सबै समन्वयकारी भूमिका निर्वाह गर्न संघ तयार रहेको बताएका थिए । परिचयात्मक तथा अन्तरक्रिया कार्यक्रममा प्राप्त सुझावहरुलाई प्राथमिकतामा राखेर कार्यसम्पादन गर्दा आवश्यक सहकार्य र समन्वय गरेर अगाडी बढ्ने बताउँदै कोहलपुर प्रहरी प्रमुख प्रहरी उपरीक्षक मल्लले नागरिक समाजको सहयोग बिना प्रहरीको अभियान अधुरो रहने बताए । “प्रहरी मेरो साथी” भन्ने नारालाई आत्मसाथ गरेर प्रहरी र नागरिक समाजबीच सदैव सहकार्य हुनसकेको खण्डमा नागरिकहरुले शान्ति सुरक्षा प्रत्याभूत गर्न सहज हुने प्रहरी उपरीक्षक मल्लको भनाई थियो । ट्राफिक व्यवस्थापनमा नागरिक समाजको सहयोगको निरन्तरता पाउने विश्वास व्यक्त गर्दै बाँके ट्राफिक प्रमुख शाहले जिल्लाको ट्राफिक व्यवस्थापन कायम राख्न कुनै कसर बाँकी नराख्ने बताएका छन् ।