काठमाडौँ, २४ चैत।

कोरोना भाइरसको संक्रमण मत्थर हुँदै गएपछि खोप लगाउने मानिसको संख्या पनि पातलिंदै गएको छ। केहि समयअगाडी सम्म खोप लगाउन मानिसको तँछाड मछाड हुने गर्थ्यो तर अहिले खोप लगाउने मानिस नहुँदा खोप खेर जान थालेको छ ।

पछिल्लो समय खोप लगाउन मानिस नआउँदा खोप खेर जान थालेको काठमाडौँ स्वास्थ्य कार्यालयले जनाएको छ । भण्डारणको व्यवस्थाका कारण मोडर्ना खोप धेरै खेर गएको छ। पछिल्लो समय मानिस खोप लगाउनै नआएको कार्यालयले जनाएको छ। 

मोर्डना खोप माइनस २५ डिग्रीमा राख्नुपर्ने हुन्छ । उक्त खोप माइनस २५ डिग्रीबाट निकालिसकेपछि माइनस दुईदेखि आठ डिग्रीमा राखेर एक महिनाभित्र लगाउनुपर्ने हुन्छ । स्वास्थ्य मन्त्रालय स्वास्थ्य सेवा विभागका अनुसार देशभर १० हजार मात्रा मोडर्ना खोप खेर गएको छ । त्यसमध्ये काठमाडौँ उपत्यकामा मात्र तीन हजार मात्रा मोर्डना खोप खेर गएको छ ।

सरकारले मानिस कोरोनाविरुद्धको खोप लगाउन नआएका कारण बुस्टर डोज पूर्ण खोप लगाएको तीन महिनामै लगाउन पाइने निर्णय गरेको छ । यसअघि पूर्ण मात्रा खोप लगाएको छ महिनापछि मात्र बुस्टर डोज खोप लगाउन मिल्दथ्यो ।