सल्यान / पूर्व उप प्रधानमन्त्री एवम् निवर्तमान राप्रपा अध्यक्ष कमल थापा समूहले राप्रपा परित्याग गर्दै पुर्नगठन गरिएको राप्रपा नेपालले आक्रामक ढंगबाट संगठन विस्तारमा जुटेको छ ।

छोटो समयमा राप्रपा नेपालले ७७ वटै जिल्ला जिल्ला कार्यसमिति चयन गर्दै पार्टीलाई सांगठनिक रुपमा सुदृढ पार्ने क्रममा सल्यानमा पार्टी कार्यालय उद्घाटन सँगै अगुवा कार्यत्रकर्ता भेला सम्पन्न गरेको छ ।

पार्टीका केन्द्रिय उपाध्यक्ष राजेन्द्र वीर रायले राप्रपा नेपाल सल्यान जिल्ला कार्यसमिति कार्यालय उद्घाटन गर्दै प्रजातन्त्रको हिमायती पार्टी राप्रपा नेपाल भएकाले अबको केही समयमा नेपाली राजनीतिमा प्रभावशाली पार्टी बन्ने बताए ।

कार्यक्रमका प्रमुख अतिथि समेत रहेका केन्द्रिय उपाध्यक्ष रायले हिन्दु राष्ट्र कायम राखेर नेपाललाई अन्र्तराष्ट्रिय समुदायमा नेपाललाई फरक चिनारी स्थापित गर्न राप्रपा नेपालले कुनै कसर बाँकी नराख्ने धारणा राखे । अबको स्थानिय तहको निर्वाचन मार्फत राप्रपा नेपालको हैसियत अन्य राजनीतिक दलहरुले बुझ्ने बताउँदै उनले केही वर्षभित्र नेपाली राजनीतिमा राप्रपा नेपाल निर्णायक राजनीतकि शक्तिको रुपमा उदाउने विश्वास व्यक्त गरेका छन् ।

यस्तै कार्यालय उद्घाटन पछि कार्यकर्तालाई सम्बोधन गर्ने क्रममा पार्टीका केन्द्रिय सह महामन्त्री हिक्मत ढकालले १ महिनामै ७७ जिल्ला समिति गठन गरेर जिल्ला कार्यालय स्थापना भईसकेकाले नेपाली जनताको रोजाइमा राप्रपा नेपाल रहेको प्रमाणित भएको बताए ।

कमल थापाले नेतृत्व गरेको राप्रपा नेपालले छिट्टै नै आफ्नो बर्चश्व कायम गर्ने उनले ठोकुवा गरेका छन् । अबको स्थानीय तहको निर्वाचनको परिणाम मार्फत राष्ट्रिय राजनीतिमा राप्रपा नेपालले आफ्नो स्थान सुरक्षित गर्ने उनको भनाई छ । सल्यान जिल्ला अध्यक्ष बालाराम शर्माको सभापतित्वमा सम्पन्न कार्यक्रममा राप्रपा नेपालका केन्द्रिय सदस्य श्रीधर सुवेदी लगाएत जिल्ला तहका अगुवा नेता तथा कार्यकर्ताहरुको उपस्थिती रहेको थियो । कार्यक्रम जिल्ला सचिव विमर्श प्रधानले संचालन गरेका थिए ।