संघीय सांसद तथा नेपाली काँग्रेसका केन्द्रिय सह महामन्त्री किशोर सिंह राठौरले विद्यार्थीहरुलाई अध्ययनमा लगनशील बन्दै कठोर अनुशासन पालन गर्न अनुरोध गरेका छन् । कोहलपुरमा रहेको त्रिभुवन नमूना मा.वि.मा विद्यार्थीहरुमाझ उनले अनुशासनलाई आत्मसाथ गरेको खण्डमा विद्यार्थीमा लगनशीलता सँगै व्यक्तित्व विकास हुने भएकाले अध्ययनमा बढिभन्दा बढि समय व्यतित गर्न आग्रह गरेका छन् । गोल्डेन एज मल्टि प्रपोज प्रा.ली.ले आफ्नो तेस्रो वार्षिक उत्सवको अवशरमा कोहलपुर नगर क्षेत्रमा रहेका सामुदायिक विद्यालयमा अध्ययनरत अति विपन्न विद्यार्थीलाई शैक्षिक सामाग्री सहित विद्यालय पोषाक वितरण कार्यक्रममा प्रमुख अतिथिको रुपमा सहभागि हुन कोहलपुर आइपुगेका नेपाली काँग्रेसका प्रभावशाली नेता समेत रहेका सह महामन्त्री राठौरले मुलुकमा गुणस्तरिय शिक्षाको विकास हुन सकेमा मात्र सबै क्षेत्रको सर्वाङ्गिण विकास हुने बताए । बाँकेको शिक्षा क्षेत्रमा लामो इतिहास बोकेको त्रिभुवन नमुना मा.वि.को शैक्षिक गतिविधी चलायमान बनाइराख्न अन्य राजनीतिक दल तथा सरोकार निकायसँग समन्वय गरेर अगाडी बढ्न स्थानिय काँग्रेस नेतृत्वलाई उनले निर्देशन समेत दिएका छन् ।

लोकतन्त्रको आधार स्तम्भ शिक्षा हुने भएकाले गुणस्तरिय शिक्षा प्रवाह गर्दै शिक्षाको अधिकारबाट कुनै पनि बालबालिका बञ्चित हुन नपरोस् भनेर नेपाली काँग्रेसले नीतिगत रुपमा धेरै वर्ष अगाडीबाट संवेदनशीलता देखाइरहेको बताउँदै त्रिभुवन नमूना मा.वि.लाई देशैभरमा अब्बल र उत्कृष्ठ शैक्षिक संस्थाको रुपमा विकास गर्न आवश्यक सहयोग गर्ने प्रतिबद्वता समेत नेका सह महामन्त्री राठौरले व्यक्त गरेका छन् । विद्यार्थीलाई विद्यालय पोषाक सहित शैक्षिक सामाग्री वितरक संस्था गोल्डेन एज मल्टि प्रपोज प्रा.ली.का अध्यक्ष जय सिंह के.सी.ले कोहलपुर नगर क्षेत्रमा रहेका सामुदायिक विद्यालयमा अध्ययनरत विभिन्न विद्यालयका ७५ जना विपन्न तथा जेहेन्दार छात्र छात्रालाई संस्थाको तस्रो वार्षिक उत्सवका अवशरमा सहयोग गरेको जानकारी दिए । उनले कोभिड महामारी समयमा स्वास्थ्य सुरक्षा तथा खाद्यान्न सहितको राहत सहयोग विभिन्न स्थानमा क्वारेन्टिनमा बसेका नागरीकहरुलाई सहयोग गर्दै आएका थिए ।