प्रतिनिधिसभाको बैठक आज बस्दै छ। संघीय संसद् भवन नयाँ बानेश्वरमा दिउँसो १ बजे बस्ने बैठकमा अमेरिकी सहयोग परियोजना (एमसीसी) टेबल नहुने भएको छ।

बिहीबार साँझ बालुवाटारमा बसेको सत्तारूढ दलको बैठकले एमसिसी शुक्रबार पनि संसदमा टेबल नहुने निर्णय गरेको एक नेताले बताएका थियो।

‘बैठक सकिएको छ। एमसिसी भोलि पनि टेबल नगर्ने सहमति भएको छ,’ ती नेताले भने, ‘अझै छलफल गरौं, अध्ययन गरौं, बाटो खोजौं, गठबन्धन भरसक नटुटाऔं भन्ने छ।’

संसद् सचिवालयले सार्वजनिक गरेको सम्भावित कार्यसूची अनुसार बैठकमा प्रधानमन्त्री शेरबहादुर देउवाले आदिवासी जनजाति आयोगको प्रतिवेदन आव २०७७/०७८ पेस गर्ने सम्भावित कार्यसूची छ।

संसद् बैठकअघि आजै प्रतिनिधिसभा कार्यव्यवस्था परामर्श समितिको बैठक बस्दैछ। त्यसले बैठकका कार्यसूची तय गर्नेछ। अवरोध खुलाउने विषयमा पनि छलफल हुनेछ।

लामो समयदेखि प्रमुख प्रतिपक्ष दल नेकपा एमालेका सांसदले संसद् बैठक अवरुद्ध गर्दै आएका छन्। 

त्यसअघि, आजै बिहान सत्ता गठबन्धनमा आबद्ध दलका नेताहरूको बैठक बस्दै छ। बैठक बिहान १० बजे बस्नेछ। उक्त बैठकमा एमसीसीलगायत विषयमा निर्णय गर्ने अपेक्षा गरिएको छ।

यता नेपाली कांग्रेसका नेता तथा सञ्चार तथा सूचना प्रविधिमन्त्री ज्ञानेन्द्रबहादुर कार्कीले एमसिसी संसदबाट अनुमोदन हुने बाटोमा गएको दाबी गरेका छन्।

‘संसदलाई कसरी सुचारू गरिने, एमसिसीलाई कसरी संसदमा लैजाने भन्नेबारे छलफल भयो,’ बिहीबार साँझ गठबन्धन बैठक सकिएपछि पत्रकारहरूसँगै कुरा गर्दै मन्त्री कार्कीले भने, ‘थप छलफल गर्न शुक्रबार १० बजे बैठक बस्छ। प्रधानमन्त्रीले फागुन १६ भित्र एमसिसी पारित गर्नुपर्छ भन्नुभएको छ। छलफल त्यही दिशामा छ।’

सत्ता गठबन्धनमा कांग्रेस एमसिसी टेबल गर्ने पक्षमा अभिएको छ भने माओवादी केन्द्र, एकीकृत समाजवादी विपक्षमा उभिएको छ।

बुधबार बसेको माओवादी संसदीय दलको बैठकले जबरजस्ती एमसिसी पारित गर्न खोजे सरकारबाट बाहिरिने निर्णय गरेको थियो।

यता पाँचदलीय गठबन्धन बैठक सकिनेबित्तिकै प्रधानमन्त्री शेरबहादुर देउवा प्रमुख प्रतिपक्षी नेकपा एमाले अध्यक्ष केपी ओलीलाई भेट्न बालकोट पुगेका थिए।

बालकोटमा के कुरा भयो, त्यो त बिस्तारै खुल्दै जाने छ। अहिलेलाई दुइटा प्रश्न महत्वपूर्ण छन्।

पहिलो, देउवा गठबन्धन छाड्ने र ओलीसँग मिलेर एमसिसी पास गर्ने ‘मन बनाएर’ पत्नी आरजु राणासहित बालकोट गएका हुन् वा ओलीको कुरा बुझ्न मात्र गएका हुन्?

दोस्रो, गठबन्धन तोडे देउवालाई समर्थन गर्न ओली तयारै हुन्, तर उनलाई चुनावसम्म प्रधानमन्त्री मान्न तयार हुन् कि होइनन्?

यिनै दुई प्रश्नको उत्तरमा देउवा र ओलीबीच बालकोटमा बिहीबार साँझ भएको वार्ताको परिणाम निर्भर गर्छ।