नेकपा (माओवादी केन्द्र) का नेता एवम् शिक्षा, विज्ञान तथा प्रविधिमन्त्री देवेन्द्र पौडेलले अहिलेको पाँच दलीय गठबन्धन आगामी तीनै तहको निर्वाचनसम्म कायम रहने विश्वास दिलाएका छन्। 

शनिबार राजधानीमा आयोजित साक्षात्कारमा बोल्दै मन्त्री पौडेलले यस्तो बताएका हुन्। 

उनले भने,‘अहिले स्थानीय तहको निर्वाचन एकै चरणमा गर्नेगरी मिति घोषणा भैसकेको छ। यो राम्रो कुरा हो। लोकतन्त्रमा निर्वाचन भनेको अनिवार्य कुरा हो, आधार हो। निर्वाचनको मिति घोषणा भएको छ, यो महत्वपूर्ण विषय हो। ०७४ सालमा स्थानीय तहको निर्वाचन हुँदा तीन चरणमा भएको थियो, त्यसमा कुनलाई अन्तिम कार्यकाल मान्ने? भन्ने कुरा थियो। यो विषय ऐन/कानुनमा लेखिएको थिएन। त्यही भएर छलफल भयो। निर्वाचन नगर्ने वा सार्ने भन्ने कुरा थिएन। मिल्छ भने तीनै तहको निर्वाचन एकै पटक गर्ने भनेर छलफल भएको थियो।’

उनले अहिलेकै गठबन्धनले तीनै तहको निर्वाचन सम्पन्न गर्ने दाबी गरे। 

उनले भने,‘एक वर्षभित्र सबै तहको निर्वाचन गराएर मुलुकमा तीनै तहमा नयाँ सरकार आउँछन्, स्थानीय तहको निर्वाचन एकै चरणमा हुने घोषणा गरेको छ। स्थानीय तहको सम्पन्न भएपछि हामी प्रदेश र संघको निर्वाचनको मिति घोषणा गर्छौं। यही सरकारले सबै तहको निर्वाचन गराउँछ।’

उनले स्थानीय तहको निर्वाचनमा सरकारमा आवद्ध दलहरूबीच चुनावी गठबन्धन हुने विश्वास दिलाए। 

उनले गठबन्धन नभए पनि आफ्नो दल एक्लै भए पनि चुनावमा प्रतिष्पर्धा गर्ने बताए। यद्यपि गठबन्धनका अध्यक्षहरूमा भने

अहिलेको पाँच दलीय गठबन्धनलाई चुनावसम्म लैजानुपर्छ भन्ने धारणा रहेको उनले सुनाए। 

मन्त्री पौडेलले अमेरिकी सहयोग परियोजना एमसिसीबारे सबै दलमा एकमतको धारणा नभएको बताए। 

उनले भने,‘एमसीसीबारे अहिलेसम्म संस्थागत निर्णय गरेर कुनै पनि पार्टीले एकमत बनाएका छैनन्। एमसिसीबारे राष्ट्रिय सहमति बनाउनुपर्छ। अहिले यो विषयमा छलफल चलिरहेको छ।