गाउँपालिकाद्वारा आश्रित परिवारलाई भवन हस्तान्तरण

राँझा, १४ माघ
बाँकेको खजुरा गाउँपालिकाले सामूहिक आवास कार्यक्रमअन्तर्गत आश्रित परिवारलाई १६ घर हस्तान्तरण गरेको छ । खजुरा–३ स्थित बी बोरिङमा व्यवस्थित १६ घर तयार भएपछि आज औपचारिक कार्यक्रम गरी आश्रित परिवारलाई आवास हस्तान्तरण गरिएको खजुरा गाउँपालिकाका अध्यक्ष किस्मतकुमार कक्षपतिले जानकारी दिनुभयो ।
उहाँका अनुसार भूमिहीन सुकुम्वासी बसिरहेकै ठाउँमा घर बनाई दिँदाभन्दा सामूहिक आवासको अवधारणा प्रभावकारी हुने विश्वासका साथ घर, शौचालय, आन्तरिक सडक सबै व्यवस्थित बनाइएको छ ।
तराई मधेस समृद्धि कार्यक्रमको रु ७० लाख लागतमा डेढ बिघा सरकारी जग्गामा व्यवस्थित १६ घर तयार गरी हस्तान्तरण गरिएको उहाँको भनाइ छ । १६ घर निर्माण भइसकेको बी–बोरिङ खजुरामा यो वर्ष पाँच घर निर्माण भइरहेका छन् ।
तराई मधेस समृद्धि कार्यक्रमसँग गाउँपालिकाले साझेदारी कार्यक्रमअन्तर्गत अति विपन्न परिवारलाई आवास बनाएर हस्तान्तरण गरिएको गाउँपालिकाका योजना अधिकृत दिलबहादुर पौडेलले बताउनुभयो ।
प्रतिक्रिया दिनुहोस्